© 2022 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Maymonydês o medhek Yêdhow ha’n brâssa fylosofer Yêdhow bythqweth a veu. An hanow Maimonides yw form Latyn usy ow mênya Mab Maymôn. Y hanow in Ebrow yw Raby Moshe ben Maymôn ‘Raby Moyses mab Maymôn’, ha’n hanow hir-na yw cot’hës dhe Rambam. Maymonydês a veu genys in Córdoba, Spayn i’n vledhen mil udn cans try deg eth. Pàn o Maymonydês yonk, y feu Córdoba conqwerrys gans teylu Sarsyn dhyworth Afryca North ha’n rêwlysy nowyth a omdednas an pryvylej a’s teva Yêdhowon ha Cristonyon dhe vêwa in Stât Moslem. Y a ylly trailya dhe Islam, godhevel mernans pò exîlya aga honen. Mêny Maymonydês a fias—kyns oll dhe Fez in Morockô, ena dhe Palestîn ha wàr an dyweth y êth ha trega in Ejyp. I’n termyn-na Maymonydês a studhyas dyvynyta ha medhegieth. Pàn verwys y vroder yonca wàr viaj dhe Eynda, y feu kellys ganso rychyth an teylu. Rag hedna Maymonydês a drailyas y vrÿs dhe vos medhek. In Ejyp ev a veu henwys fysycyen dhe scryvynyas an Sowdon Saladin hag ena dhe Saladin y honen. In y scrîvyow adro dhe fysek Maymonydês a spêdyas dhe dhescrefa lies dysês, i’ga mesk, berr-anal, cleves shùgra, cleves avy ha tanyjyon skevens. Ev a wre poosleva an otham a vos temprys ha dhe vêwa in maner yagh. Heb mar yth yw Maymonydês aswonys dhe’n moyha avell dyvyn ha fylosofer. Rag an kensa prës bythqweth ev a wrug reckna an tredhek pednrêwl a res dhe bùb Yêdhow assentya dhodhans. Y yw an re-ma:: fatell usy Duw; Duw dhe vos unyta pur; Duw dhe vos heb corf; Duw dhe vos dyvarow; fatell yw res gordhya Duw yn udnyk; fatell usy Duw ow kemenessa gans an profettys; fatell veu an Torah (Laha Moyses) rÿs gans Duw; na yll an Torah bos chaunjys; fatell usy ragwelesygeth Duw; fatell usy reward ha pùnyshment ow tos dhyworth Duw; fatell wra dos an Messias ha fatell vëdh an re marow dasserhys. Ober Maymonydês moyha a bris yw an Gedlyver rag an Re Ancombrys. I’n lyver hir-na yma Maymonydês ow ry y opynyon fatell usy oll laha an Yêdhowon intendys dhe wil dew dra: gwellheans an corf ha gwellheans an enef. Yth yw an enef amendys dre gafos skians a bùptra a yll mab den godhvos. Dhe voy skians a’s teves an enef, dhe voy yth yw hy abyl dhe gollenwel an comondment dhe gara Duw. An brâssa let wàr an fordh dhe gara Duw yw an grejyans na ylly mab den bos lel dhe’n Scryptour marnas ev dhe gonvedhes geryow an Beybel warlergh an lyther. Saw mar teu nebonen ha styrya an text warlergh an lyther, nena ev a vydn cafos tybyans materyal a Dhuw. Saw in opynyon Maymonydês, nyns yw an grejyans bos Duw corforek in neb sens tra vëth ken ès idolatry. Nyns o pùb Yêdhow pës dâ gans derivas Maymonydês, spessly dre rêson y dybyansow dhe favera an den deskys kyns ès kenyver den cryjyk. Yth o Maymonydês a bris brâs bytegyns ha lies fylosofer a dheuth in dadn y awedhyans ev, rag ensampyl Tomas Aqwînas, Spinôza ha Leibniz.