© 2014 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Albert Reynolds a verwys agensow hag ev udn vledhen ha peswar ugans bloodh. Ev o penvenyster Wordhen in mis Kevardhu mil naw cans naw deg peswar, pàn wrug ev ha John Major penvenyster an Vreten Veur dyllo Declaracyon Strêt Downing. An dhogven-na a affyrmyas gwir pobel Wordhen aga honen dhe dhetermya aga thermyn devedhek aga honen. An declaracyon a leverys inwedh na wrella Wordhen North gasa an Wlascor Udnys ha jùnjya orth Poblegeth Wordhen erna wrella pobel Wordhen North vôtya rag an chaunj. Y feu promyssys i’n Declaracyon inwedh y fia chauns dhe bartys kelmys gans parabreselegyon pò paramilitaries kemeres radn in kescowsow cres, mar teffens ha sconya yn tien an danbellen ha’n bùlet. Kynth o Reynolds kenedhlegor, hag ev ow qwetyas gweles Wordhen udnys i’n termyn esa ow tos, nyns esa dhodho ma’s scorn rag garowder gwlasek. Reynold a dhalathas y resegva boblek in negys helow dauncya y vroder in bledhydnyow hanter-cans. In meur a Wordhen i’n termyn-na nyns esa meur dhe entertaynya an bobel yonk ha’n helow dauncya a lenwys an ajwy. I’n vledhen mil naw cans whe deg dew Reynolds a wrug ambos gans Kenny Ball ha’y Jazzmen dhe seny in y helow dauncya in Wordhen. Dre hap nebes mîsyow moy adhewedhes Ball a dhyllas y record ‘Hanternos in Moscow’, ha’n record-na a veu spêda vrâs. Pàn dheuth Ball ha’y vûsycyens dhe Wordhen, helow Reynolds a vedha lenwys kenyver gordhuwher ha Reynolds a wrug showr a vona. Ev a werthas y radn in negys an helow dauncya yn scon wosa hedna ha dallath gwil taclow erel. Ev a veu dêwysys avell esel Seneth Wordhen rag Longford-Westmeath i’n vledhen mil naw cans seyth deg seyth hag ev a sensys an esedhva-na dres moy ès ugans bledhen. Pàn esa Reynolds ow restry y helow dauncya y fedha res dhe dhodho viajya dres oll Wordhen Soth ha North hag in vledhydnyow-na ev a wrug kestava gans tus a bub sort i’n Wordhen North, tra o gweres brâs dhodho ugans bledhen moy adhewedhes pàn esa an Proces Cres pò Peace Process ow tallath. In gwir yma radn ow leverel fatell o Reynolds y honen a wrug dhe’n parabreselegyon sconya garowder. Mar nyns yw an mater mar sempel avell hedna, Reynold a gemeras radn a vris in cessya keskerdh euth an repùblycans. Reynolds a asas y sodh avell taoiseach pò penvenyster termyn cot wosa Declaracyon Strêt Downing. Ev a’n jeva govenek a gafos hanwans y barty (Fianna Fáil) avell ombrofyor rag presydent Wordhen. I’n gwetha prës ny wrug Reynolds soweny i’n assay-na ha’n onour êth dhe Mary McAleese. Brâssa kemynro Albert Reynolds bytegyns o cres in Wordhen ha moy yw hedna es neb tra aral.