(375) Cyta Gonysegeth - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

I’n vledhen mil naw cans peswar ugans ha pymp y feu dalethys an ragdres aswonys avell Pencyta Ewropek Gonysegeth pò ‘European Capital of Culture’. Res o dhe’n cyta dhêwysys restry towlen a wharvedhyansow cùltûrek gans performoryon genesyk ha tramor. Yma an tîtel Pencyta Gonysegeth ow ry chauns dhe’n cyta dhe dhendyl hanow dâ hag aswonvos rygthy hy honen wàr level Ewropek ha martesen dhe wil mona kefrës. Athênas a veu an kensa cyta dhe recêva an tîtel, hag y feu lies tre dêwysys wosa hedna. Lêrpol a recêvas an onour i’n vledhen dyw vil hag eth, ha’n solempnyta dhia vis Genver dhe vis Kevardhu a veu a brow erbysek dhe’n cyta. Governans an Wlascor Udnys ytho a erviras restry kesstrîf a’ga honen rag dêwys kensa Cyta Gonysegeth an Wlascor Udnys. Derry in Wordhen North a veu dêwysys rag an vledhen dyw vil ha tredhek. Governans Wordhen, dell hevel, a brederys polycy an Wlascor Udnys dhe vos tybyans dâ, hag y a wrug dêwys Lymryk heb kestrîf vëth avell Cyta Gonysegeth Wordhen dhe’n vledhen dyw vil ha peswardhek. Drefen an Udnyans Ewropek ha’n IMF dhe vos prederus adro dhe stât erbysek Wordhen, ny ylly an governans leverel poran pygebmys mona a vedha grauntys dhe’n ragdres. Saw gans negyssyow a’n brâster-ma res yw pùpprës ragerhy mûsycyens ha gwarioryon lies mis dhyrag an termyn. Yth esa kevarwedhor artys an cyta ow tevy pòr anês adro dhe’n lack a certuster. Ny wrug ev desky adro dhe vyns y vojet bys mis Hedra. Ena y feu appoyntys heb kestrîf poblek Chîf-Offycer Menystrans rag restry oll an negys a-ugh y bedn. An Chîf-Offycer-ma hy honen a avowas na wodhya hy tra vëth ow tùchya an artys. Pàn veu dyscudhys hy dhe wil devnyth a gowethas kenwerthek rag restry solempnyta dallath an vledhen a gùltûr, an kevarwedhor artys a omdednas dhyworth y soodh. Saw yth esa kebmys envy warbydn an Chîf-Offycer Menystrans hy honen in mesk pobel an artys in Lymryk, may feu res dhedhy hy omdedna kefrës. Y wharva ytho Lymryk, Cyta Gonysegeth Wordhen, dhe vos gesys heb condûk vëth i’n kensa seythen an gool, ragdres o porposys dhe dhurya bys pedn bledhen. Lies drâma re beu arayes in Lymryk rag dyw vil ha peswardhek. Dre lycklod nyns esa pobel an cyta ow qwetyas gwary fol a’n par-ma mar avarr i’n vledhen.