© 2015 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Derek Brockwell yw consydrys felon fest peryllys. Genys veu in Scotlond; yth ywa try ha hantercans bloodh ha moy ès whegh tros’hës in uhelder. Ev re beu in trobel gans an laha abàn esa va in y vledhydnyow wàr dheg. Y feu va charjys gans lies drogober dres an bledhydnyow hag y feu convyctys moy ès deg bledhen alebma a robbya shoppys gwystla gans garowder. Yth esa ev ow servya sentens bêwnans rag hedna in Pryson Kirkham in Conteth Ker Hirvryn pò Lancashire. Tredhek bledhen o spênys ganso in pryson, pàn wrug ev i’n vledhen dyw vil ha dewdhek scappya ha dos dhe Wordhen. Ev a robbyas arhanty in Blackrock, Conteth Dulyn i’n keth bledhen. Ev a veu kechys, tries ha danvenys dhe Bryson Port Laoise. Dyw vledhen aberth i’n sentens-na ev a veu drës agensow dhe Glâvjy Tallaght rag cafos dyghtyans rag cleves melys pò diabetes. Yth esa dew greswas orth y wardya, saw alejyw yw Brockwell dhe dhry in mes collel ha’ga gwana. Onen anodhans a veu tebel-wolies. Dùstuny a lever fatell esa goos in pùb le. Yth yw alejys fatell wrug Brockwell diank wàr vôtor-dhywros, provies martesen gans kesgal pò accomplice. Ev êth dhe Belfast in North a Wordhen. Yth yw alejys ev dhe entra in shoppa apotecary in Belfast, godros an mêny gans collel ha ladra sùmen a vona dhywortans. Yth o va porposys martesen dhe vos wàr an gorhal dhe Lêrpol, saw an gôlyans an jëdh-na o dylâtys bys in nessa dëdh. Creswesyon Wordhen North a dheuth warnodho in tavern in Belfast le mayth esa ev owth eva. Yth yw alejys fatell a dhros Brockwell y gollel in mes arta ha gwana y honen in y dorr. An greswesyon a wrug dyllo taser orto hag ev a veu drës dhe Glâvjy Rial Vyctorya, may feu y woliow dyghtys. Ev a veu charjys wosa hedna a dhew acownt a ladrans hag a dhew acownt a arv beryllys dhe vos in y bosessyon. An creslu in Pow an Sowson, in Poblegeth Wordhen hag in Wordhen North a garsa côwsel orto. Pàn vo va relêssys dhyworth an clâvjy, ple fëdh ev danvenys kensa? Hèn yw an qwestyon brâs.