© 2022 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n tradycyon Kembrek Merlyn yw gelwys Myrddin. Yth hevel fatell usy dew berson dyffrans adherlergh dhe’n hanow. Myrddin mab Morvryn o soudor in North a Vreten Veur. Ev a omladhas in batel Arderydd a veu jùnys i’n vledhen pymp cans seyth deg try inter Gwenddoleu ap Ceidio, chyften an pow adro dhe Carlisle, ha Rhydderch Hel, mytern Alt Clud pò Nans Cyde. Myrddin o prydyth Gwenddoleu ha dre rêson a’n vatel, ev a gollas y rêson ha fia avell den gwyls i’n cosow. Rag hedna ev o gelwys Myrddin Wyllt (Merlyn Gwyls). In y vuscogneth Myrddin a gafas an ro a welesygeth hag y fedha cresys ev dhe allos profusa an dedhyow esa ow tos. An secùnd Myrddin yw kefys i’n scrîvyow Jeffrey a Venow (‘Geoffrey of Monmouth’). Pàn gafas Jeffrey an hanow Kembrek Myrddin, ev a wrug y Latynhe avell Merlinus kyns ès *Merdinus. Dre lycklod nyns o va parys dhe ûsya an form *Merdinus drefen hedna dhe vos re haval dhe merde ‘cawgh’ in Frynkek. In istory Jeffrey Merlyn o maw yonk i’n pympes cansvledhen, hèn yw in dedhyow Vortygern pò Gortheyrn, mytern Breten Veur. Merlyn a ros cùssul doth dhe Vortygern ow tùchya tour brâs esa Vortygern ow terevel rag gwetha y honen warbydn chyften an Sowson. Herwyth Jeffrey, nyns esa tas vëth dhe Merlyn. Y vabm o lenes ha hy a vedha vysytys gans incubus, hèn yw dhe styrya, dyowl a vedha owth apperya dhe venyn in hy gwely. Y feu Merlyn denethys a’n jevan, saw drefen ev dhe vos besydhys kettel veu va genys, nyns o va dyowlak yn tien. Herwyth Jeffrey a Venow yma Merlyn ow qwary part brâs inwedh in genesygeth Arthùr Mytern. Gorloys, dûk Kernow, a’n jeva gwreg henwys Igrain. Hy o tecka ès oll benenes Breten. Mytern Breten Ûther Pendragon a veu lenwys a whans aflan rygthy. Merlyn dre bystry a worras semlant Gorloys, gour ty Igrain, wàr Ûther. Igrain ytho a alowas Ûther dhe gùsca gensy drefen hy dhe gresy Ûther in shâp Gorloys dhe vos hy gour. Y feu Arthùr denethys an nos-na, kynth o marow Gorloys solabrÿs. Ny veu dyscudhys fatell o Ûther Pendragon gwirdas Arthùr, erna wrug Arthùr, hag ev pymthek bloodh, tedna an cledha hudol i’n mes a’n anwan. Gwander brâs Merlyn o ev dhe vos tùllys gans benenes. An dùllores vrâssa o Vyvyen. Merlyn a’s kemeras hy avell dyscypyl dhodho y honen hag a dhescas oll y hus ha’y gevrînow dhedhy. Wàr an dyweth Merlyn a veu mar anfur dhe dhyscudha dhedhy son kevrînek arbednyk, kynth o va ownek hy dhe ûsya an pystry-na wàr y bydn. Hèn yw an dra poran a wrug hy. Vyvyen a wrug obery an son hudol wàr Merlyn hag ev a godhas in cùsk dydheweth. Warlergh hedna Vyvyen a gemeras le ha roweth Merlyn in cort Arthùr Mytern hag in mesk Marhogyon an Tâbel Rônd. Adro dhe’n vledhen mil eth cans seyth deg pymp Edward Burne-Jones, an paintyor ken-Rafaelîtek, a wrug paintyans meur y hanow a Merlyn ha Vyvyen. I’n pyctour yma Merlyn oll a’y anvoth ow plêgya dhe bystry Vyvyen.