© 2015 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Cigireacht an Gharda Síochána ‘Whythroryon Creslu Wordhen’ pò Irish Police Inspectorate a dhyllas aga derivas agensow. Ymowns ow paintya pyctour negedhek lowr a servys an greswesyon in Poblegeth Wordhen. Y fedha lies fowt ha lies dyfyk in oberyans an creslu i’n bledhydnyow dewetha-ma. Rag ensompel practys ûsys o in mesk an greswesyon lehe sevureth a gâssys a violacyon hag a assaultyans carnal ha’ga recordya avell drog-oberow bohes aga foster. Ha drog-ûsadow aral o kebmyn, hèn yw settya offycers rag whythra cassys a gabmweyth carnal na gafas bythqweth dyscans arbednek rag an ober tykly. Dyfyk aral o an greswesyon dhe vos mygyl lowr ow tùchya garowder i’n teylu pò ‘domestic violence.’ In udn cass an greswesyon a veu gelwys dhe jy mayth esa an wreg in peryl a vos ledhys gans hy gour. An creslu a dheuth dhe’n chy ha ny wrussons tra vëth marnas leverel y dhe vos re vysy dhe dhewheles. Moy adhewedhes an keth jorna-na an wreg a veu drog-pystygys gans hy gour ha’y flogh a veu pystygys in udn whelas dyffres y vabm. Fowt aral o an mater a dhylâtyans ow tuchya reportyans drog-oberow. In udn câss a ladrans rag ensampel dewdhek mis a bassyas inter reportyans an ladrans ha’n greswesyon dhe gemeres derivas dhyworth dùstuny. Yma onen a’n fowtys brâssa ow tùchya pryvetter. Adro dhe udn cans hag ugans mil person yonk yw drës dhyrag an cortys kenyver bledhen hag y in dadn skeus a dhroggys dhe vos in aga fosessyon. Ny vëdh aga henwyn dylës nefra dhyworth system amowntya an greswesyon. Hag ytho yma record a dhrog-oberoryon dhedhans. Rag hedna ny yllons y whelas ober in powyow tramor kepar ha’n Stâtys Udnys, Canada hag Australya. Dell leverys vy solabrës, yma an greswesyon ûsys dhe recordya assaultyans warbydn benenes avell neppyth le y boster. Ymowns y ow qwil an keth tra gans kenyver sort a drespas. Mar pëdh drog-ober poos recordys avell neb tra le y sevureth, nena y fëdh gwell semlant wàr an statystygyon. Martesen y fia gwell gava nebes a’ga fowtys dhe’n Garda Siochána. Yma an servys ow sùffra rag fowt mona. Rag ensampel yma an Garda Siochána whath owth ûsya fordh rag kemeres pryntys besîas a vedha ûsys in dallath an ugansves cansvledhen. Y talvia bos system electronek dhedhans. Scant ny yllyr gwetyas servys a’n gwelha dhyworth an creslu, mar nyns eus an daffar ewn gansans. Hag yma hedna ow costya moy a vona es dell yll an governansn ry dhedhans.