© 2014 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An Ebrowyon goth a wre ûsya lytherow rag screfa nyverow. In lyver Dysqwedhyans pò Revelacyon orth dyweth an Testament Nowyth yth yw campollys ‘Nùmber an Best’ ha’n nyver-na yw whegh cans whegh deg whegh. Mar qwrer kemeres hanow an Emprour Nêro’ in Ebrow, hèn yw Nerôn Qesar, ha mar qwrer addya warbarth an valew a’n lytherow i’n hanow-na avell nùmbers, y kefyr Whegh Cans, Whegh Deg ha Whegh. Apert yw auctour Revelacyon dhe vos whensys dhe wil mencyon in dadn gel a’n Emprour Nerô. Certan yw kefrës an Gristonyon avarr dhe dyby nag o Nêro tra vëth gwell ès gothvil gwyls. Nyns yw hedna marthùjyon vëth rag Nero a gompressas an Gristyonyon yn wherow. Tregear in y homylys a lever dhyn fatell veu Peder Sans mertherys “i’n dewetha blethan a reign an cruell Emperour Nero.” In versyon Latyn a’n Testament Nowyth, an trailyans a’n Beybel aswonys i’n Eglos Keltek, yth yw nùmber an Best gelwys numerus bestiae. Bestia ‘best’ yw ger ûsys in Latyn rag ‘best’, hag y feu an keth ger-na benthygys gans an Wydhyly avell piast pò péist. Yma péist in Godhalek avarr ow styrya dragon pò tebel-vest, spessly best dowr. Tebel-vest Logh Ness in Scotlond yw péist a’n sort-na. Tabm ha tabm an ger péist a jaunjyas y styr hag y fedha ûsys rag cramvilas pò reptiles, rag prëves pò worms, bùluk pò earthworms ha godhanas po moths. Y feu an ger bestia benthygys avell best aberth in Kernowek kefrës. Martesen y feu an ger best benthygys aberth in Kernowek dydro dhyworth an Latyn, kynth eus problemow ow longya dhe’n devedhyans-na. Moy lyckly yw fatell veu an ger best kemerys dhyworth an Latyn, saw dre Frynkek ha Sowsnek Cres. Certan yw udn dra: best yw an ger moyha kebmyn in Kernowek rag ‘animal’. Nyns yw an ger mil kefys ma’s in Kernowek Coth, in Lhuyd hag in textys grôndys wàr Lhuyd. Pelha an lavar rag ‘four-footed animal’ in Kernowek yw best peswartrosek, rag yth yw an lavar-na kefys in Bewnans Ke hag in homylys Jowan Tregear inwedh. Rag hedna best, liesek bestas yw ow dêwys vy rag ‘animal’ in Kernowek.