© 2022 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yth o an hanow besyth Sylvester aswonys in Kernow i’n dedhyow coth rag yth ywa gwelys in hanow tyller adro dhe deyr mildir dhe’n north a Pensans, Chysauster, hèn yw dhe styrya Chy Sylvester. Sylvester kefrÿs o hanow pab ha sans orth very dallath an peswora cansvledhen. Y dhegol yw an unegves dëdh warn ugans a vis Kevardhu. Rag hedna in lies pow wàr vrâstir Ewrop Nos Calan Genver yw gelwys Degol Sylvester. Nyns yw nameur godhvedhys adro dhe Sylvester Sans. Y feu bêwnans lies sans cùntellys i’n tredhegves cansvledhen gans an Italyan Jacobus de Voragine in lyver gelwys an Legenda Aurea. Yma derivas cot gans de Voragine adro dhe Sylvester Sans, kyn nag yw y narracyon dhe drestya avell an gwiryoneth. Yth o Sylvester Cristyon dâ ha kerys o va gans oll pobel Rom. Pàn verwys an epscop, oll Cristonyon Rom a garsa cafos Sylvester avell pab. Sylvester a’y anvoth nebes a veu gwrÿs pab. I’n dedhyow-na yth esa Costentyn an emprour in Rom ow compressa an Gristonyon yn tydn. Sylvester ytho a asas Rom rag cafos sentry in Mownt Soracte adro dhe bymp mildir warn ugans dhe’n north a’n cyta. Avell pùnyshment rag y gruelta dhe’n Gristonyon Duw a weskys Costentyn gans cleves uthyk crohen. Costentyn a omgùssulyas gans y vedhygyon hag y a gomendyas dhodho omwolhy in goos tremmyl flogh yonk. An flehes a veu cùntellys, saw pàn welas Costentyn oll an mabmow owth ola yn pytethus, ev a borthas edrek. Gwell via ganso godhevel cleves ès ladha kebmys baby inocent. Ev a erhys ytho may fe an flehes fries ha mona rÿs dhe genyver mabm. An nos-na Sylvester a welas dre hunros Peder ha Powl. Y a gomondyas dhodho mos rag pesy besydhyans dhe’n meneth mayth esa Sylvester ow keles y honen. Costentyn a wrug meneges oll y behosow hag a recêvas besydhyans. Ena dre dregereth Duw cleves Costentyn a veu yaghhës. Termyn warlergh hedna yth omdhysqwedhas dragon uthyk in Rom esa ow ladha lies huny. An bobel a wrug cably Costentyn ow leverel nag esa dâ vëth i’n pow abàn veu va Cristyon. Costentyn a omgùssulyas gans Sylvester. Peder a apperyas dhe Sylvester hag erhy dhodho may whrella ev kemeres ganso dew japlen ha mos dhe gav an dhragon ha’y dova dre allos Crist. Indelha y wharva: an dhragon a veu mar dhov avell on ha’n paganys neb a dhowtyas Sylvester a veu besydhys. I’n vaner-na y feu cyta Rom selwys dhyworth tebel-grejyans ha dhyworth an dhragon beryllys. A les yw fatell yw an dhew wharvedhyans in mes a vêwnans Sylvester presentys dhyn i’n gwary Kernowek Bêwnans Meryasek. Ny woryn ny heb mar a wrug auctour an gwary y honen redya whedhel Sylvester i’n Legenda Aurea poken mars esa an wharvedhyansow solabrÿs in neb penfentyn aral. Me a grës nag o Jacobus de Voragine redys gans auctour Bêwnans Meryasek. Meneth sentry Sylvester herwyth de Voragine yw Mownt Soracte, saw in Bêwnans Meryasek an meneth yw gelwys Mownt Sareptyn. Yma colm inter Sylvester ha Meryasek bytegyns, rag i’n gwary yma Sylvester ow provia an bùllys rag sacra Meryasek avell epscop Venetens.