(393) Mary Killigrew - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Mary Wolverston a veu genys in Suffolk adro dhe’n vledhen mil pymp cans hag ugans ha hy a dhemedhas an peswora Syr Jowan Killigrew. Jowan o den jentyl ha Governour a Gastel Pendynas in Kernow. Y feu an castel byldys wàr diryow y deylu hag yth esa y vanor in Arwednak, radn a Falmeth hedhyw. Yth o Syr Jowan esel seneth rag Lostwydhyel ha warlergh hedna rag Penryn, bùrjestra pocket teylu Killigrew. Mary ha’y gour o aswonys dâ avell morladron. Pàn wrella gorhal ancorya in porth naturek Arwednak, y aga dew a wre danvon tus dhe entra i’n gorhal ha sêsya pùptra a valew i’n carg. Leverys o inwedh fatell wre Syr Jowan ha’y wreg brîbya offycers an porthtollow, may hallens pêsya gans aga gwrians ùnlafyl. Warlergh mernans hy gour Arlodhes Mary a dhuryas gans an morladrynsy. In mis Genver an vledhen mil pymp cans eth deg dew, pàn o Mary gwedhowes hag in hy bledhydnyow try ugans, gorhal Spaynek a dheuth hag ancorya i’n porth dhyrag manor Arwednak. Yth esa an gorhal wàr hy fordh dhyworth an Powyow Isel bys in Sen Sebastyan i’n North Ÿst a Spayn. Mary a glôwas son fatell esa carg meur y bris inhy. Hy a dhanvonas hy servysy ytho rag mos wàr bord an gorhal ha’y sarchya. Pàn esa servysy an Arlodhes ow whythra an lester, marchont wàr an gorhal a veu ledhys. Y feu Mary ha nebes a’y theylu acûsys a’n drog-ober hag a veu drës dhyrag an gort in Lan Stefan. Y feu dew a servysy Mary gorrys dhe’n mernans. Mary hy honen a veu dampnys dhe’n mernans, saw hy a recêvas pardon dhyworth Myternes Elysabeth. Dell hevel Jowan Killigrew, mab Mary, a wrug pe brîbys brâs ha wàr an dyweth Arlodhes Killigrew a veu fries in mes a’n pryson. Nyns yw godhvedhys pana vledhen a verwys hy. Yth esa hy whath ow pêwa i’n vledhen mil pymp cans eth deg seyth, pàn veu hy mab Jowan drÿs dhyrag an gort drefen ev dhe lettya oberyans an laha warbydn y vabm in mater a vorladrynsy. Ny wrug teylu Killigrew soweny re dhâ warlergh hedna. Lies bledhen wosa Mary Killigrew dhe vos pardonys, chyften an teylu o Jory Killigrew, pedn medhow a spênas meur a’y dermyn i’n tavern. Udn jëdh yth esa Jory owth eva in tavern gans nebonen gelwys Walter Vincent. Walter o laghyas hag ev a veu dôwysys avell esel seneth rag Mitchell i’n vledhen mil whe cans seyth deg naw. Pàn o Killigrew ha Vincent nebes medhow, Vincent a dhespîtyas Killigrew in udn leverel fatell veu y hen-henvam, hòn yw Mary Killigrew, dampnys dhe’n mernans rag denladh. Offendys brâs Killigrew a dednas y gledha ha Vincent a wrug an keth tra. Ena Killigrew a nessas dhe Vincent ha dre wall cledha Vincent a wanas colon Killigrew hag ev a verwys. Vincent a veu drës dhyrag an gort saw y feu va kefys inocent. Vincent a omsensas gylty bytegyns dre rêson a’n drog-labm hag ev a gemeras edrek brâs. Udn gordhuwher, pàn esa va ow kynyewel, ev a godhas marow dhyrag pùbonen.