© 2022 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Onen a’n textow gwelha aswonys in Kembrek Cres yw Pedeir Keinc y Mabinogi pò in Kernowek Peder Scoren an Mabynogyon. Y feu an kensa dyw scoren trailys dhe Gernowek gans Caradar; y a veu golegys gans Talek ha dyllys i’n vledhen mil naw cans seyth deg pymp in dadn an tîtel An Mabynogyon in Kernewek. Hanow secùnd scoren an Peder Scoren yw Branwen Myrgh Lyr hag yma hy ow terivas whedhel Branwen, whor Bran Benegys mab Lyr, mytern Breten Veur. I’n whedhel Matholwch, mytern Wordhen, a dheu dhe Gembra rag pesy Branwen orth Bran Benegys. Bran yw pÿs dâ ha’n maryach yw gwrÿs. Evnyssyen yw broder Bran ha Branwen ha dâ yw ganso pùpprës sordya strif. Pàn wrella ev dyscudha fatell veu Branwen rës dhe Matholwch heb y gubmyas ev, ev yw serrys brâs hag yma va ow procêdya dhe dhyfeleby mergh an Wydhyly. Cres yw gwrÿs inter tus Matholwch ha’n Vrethonyon bytegyns ha Branwen yw kemerys gans Matholwch dhe Wordhen. Kynth o cres ha kerensa kelmys inter an Vrethonyon ha’n Wydhyly, ny wrug an Wydhyly ankevy an vil despît o profys gans Evnyssyen dhe vergh Matholwch. Rag hedna yth yw bysmêr uthyk dysqwedhys dhe Vranwen ha hy o dyghtys avell kethes. Yma Branwen ow tova edhen bian hag orth y dhanvon gans lyther dh’y vroder in Breten Veur. Ena Bran Benegys ha lu brâs a dheu dhe Wordhen rag hy venja. Apert yw dhyworth an part-ma a’n whedhel fatell yw cowr jiantus Bran. Dell hevel ev o duw pagan in y dhevedhyans. Yth yw omlath lybm jùnys in Wordhen hag yma lies huny ledhys wàr an dhew denewen. Nyns yw gesys in Wordhen ma’s pymp benyn ha hy oll gans flogh. Aga flehes yw mebyon ha pàn vowns y tevys, yma pùbonen ow temedhy mabm y goweth. Indelha yth yw Wordhen daspoblys arta. Herwyth an auctour hedna yw prag yma pymp radn in Wordhen. Yma hedna ow referrya dhe’n ger Godhalek cúige ‘provyns’. Yma cúige ow mênya ‘pympes radn.’ Branwen bytegyns a veras orth Wordhen hag orth Breten ha hy pòr drist fatell veu dyw enys dystrôwys rag hy herensa hy. Hy holon a dorras ha hy a verwys. Ny remainyas yn few ma’s seyth den a’n Vrethonyon ha Bran Benegys a ergh dh’y sewysy trehy y bedn dhywar y gorf. Y a gebmer an pedn dhe Harlech hag yma ÿdhyn Rhiannon ow cana dhedhans hag y pòr lowen i’n tyller-na dres seyth bledhen. Nessa y a gebmer an pedn dhe Gwales in Penvro hag y yw lowen ena peswar ugans bledhen erna wrowns y egery an daras tro ha Kernow. Ena y a dheg an pedn dhe’n Vronn Wydn in Loundres ha’y encledhyas. Pàn esa an pedn i’n dor, yth esa ev ow sensy Breten frank ha salow dhyworth assaultyans. Herwyth tradycyon moy adhewedhes Arthùr mytern a dhetermyas may fe pedn Bran palys in bàn, rag yth esa ev ow cresy y vos ewn dyffres Breten dre nerth arvow kyns ès dre bystry. Y whre pobel leverel warlergh hedna fatell o coll pedn Bran Benegys an chêson rag an Sowson dhe gonqwerrya Breten.