(398) 'Out', 'outside' in Kernowek

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Rag leverel ‘out’ in Kernowek ny a lever in mes rag ensampyl in: ev a wrug dhedha yn scon mones in mes alena (Passyon agan Arlùth); êwgh in mes adhesempys; why a gell ow lowena (Origo Mundi); i’n chy Duw mars eus marhas me a’s châss in mes pùb gwas (Passio Christi). Rag ‘out of’ ny a lever in mes a, rag ensampyl: Moyses, me a gomond dhis ha dhe Aron kekefrÿs mayth ellowgh in mes a’m gwlas (Origo Mundi); Pegh o an pÿth a wrug dhe’n Tas a nev hùmbrak mab den in mes a baradîs (Tregear); Noy, me a worhemmyn dhis: kê in mes a’n lester scon (Creacyon an Bÿs). Dell leverys vy in tyller aral, an fordh welha rag trailya ‘they are going out together’ yw ymowns y ow kerdhes in mes warbarth. Res yw remembra bytegyns nag yw an tavaseth-na kefys i’n tavas tradycyonal. In mes yw ‘out’ saw dhe ves yw ‘away’. An secùnd a’n re-na a yll bos gwelys i’n lavarow-ma: gallas an glaw dhe ves glân ha’n dowr my a gres bas’hës (Origo Mundi); pàn veu an pùrpur war sqwych kechys dhe ves gans dewdhorn, worto y glenes hardlych rann a’n kig bys i’n ascorn (Resurrexio Domini); pàn dheffa an welsen ha dallath seha an flour a wra clamdera ha codha dhe ves (Tregear); Assof engrys! Dhe ves omden! (Bêwnans Ke). Rag leverel ‘outside, on the outside’ avell adverb yma Tregear owth ûsya an lavar wàr ves. Otobma dew exampyl: yma ev ow mênya na wrellen ny Cristonyon dysqwedhes agan honen dâ ha vyrtuûs, warves in syght an bÿs only ha dre racha ny a yll ùnderstondya an sin wàr ves, ùttrys in mes dre anger (Tregear). Rag leverel ‘inside and out’ yma Creacyon an Bÿs ow leverel mes ha chy i’n darn-ma usy ow sewya: Ny vÿdh skians vÿth i’n bës mès y aswon ev a wra der an planettys mes ha chy. Hag ot obma neb tra may fÿdh caletter dhe certan re ganso, hèn yw ‘outside of’. I’n gwetha prÿs nyns eus ma’s udn exampyl a hedna i’n textow ha nyns ywa re blegadow naneyl. In Resurrexio Domini an jowl Tùlfryk a lever:

Eâ, re gymmy toll ow gwèn

rag in mes yma y benn

sur pòr hir avês dhe’m tin.

Kynth o Kernowyon y das ha’y vabm, ny veu Robert Morton Nance genys in Kernow adar i’n Soth a Gembra. Ny dheuth ev dhe drega in Kernow arna veu va deg warn ugans bloodh. Mars on ny whensys dhe gôwsel adro dhe hedna in Kernowek, ny a yll leverel: Kynth o Kernowyon tas ha mabm Mordon, ny veu va y honen genys in Kernow. Poken ny a yll gwil warlergh an darn mes a Resurrexio Domini complys avàn ha leverel: Kynth o Kernowyon tas ha mabm Mordon, ev y honen a veu genys avês dhe Gernow. I’n dedhyow usy ow tos me a vydn côwsel a’n fordhow in Kernowek dhe leverel ‘in, inside, within’ hag erel. Saw lowr rag an present termyn yw hebma ow tùchya ‘out, outside, outside of’.