(4) Ana ha Joakym - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An Werhes Ker Maria heb mar yw campollys yn fenowgh i’n Testament Nowyth, saw nyns yw mencyon vëth gwrës ino naneyl a’y mabm nag a’y thas. In awayl apocryfal a veu screfys in cres an secùnd cansvledhen ny a red adro dhe Ana Sans, mabm an Werhes, hag adro dhe Joakym, hy thas ha gour ty Ana. Kynth o Ana a les brâs in powyow erel, yth hevel na vedha meur revrons rës dhedhy gans an Geltyon. Y feu gwary henwys Buhez Santez Anna ‘Bêwnans Ana Sans’ screfys in Bretonek i’n êtegves cansvledhen, saw yma an text whath in dornscrif rag ny wrug den vëth trobla y honen dh’y bryntya. Mar nyns o meur a revrons rag Ana Sans dhe nôtya in mesk an Geltyon, Joakym, gour ty Ana, o le onorys whath gansans. Nyns o Joakym a les in mesk Sowsnegoryon naneyl. Coynt yw hedna rag Joakym a’n jeves worshyp brâs in Spayn, in Italy ha spessly in Jermany; kebmyn yw Joakym i’n powyow-na avell hanow rag mebyon. Yma Joakym Sans dhe verkya rag ensampel in hanow tre i’n Poblegeth Check, pòr ogas dhe oryon Jermany. I’n tavas Check i’n jëdh hedhyw an tyller yw gelwys Jáchymov, saw pàn o an dre radn a’n Empir Jerman, hy o gelwys Sankt Joachimsthal ‘Valy Joakym Sans’. Yth esa meur a vûn arhans pò silver ore in dor Joachimsthal ha gerys brâs o an tyller rag y whelyow arhans. Dhyworth an pymthegves cansvledhen in rag y fedha bathow gwrës a arhans dhyworth Sankt Joachimsthal. An bathow-na o gelwys Joachimsthaler; ha thaler yw an form got. An thaler a vedha ûsys dres oll Jermany hag in Iselalmayn kefrës. Pàn êth an Iselalmans dhe’n Bës Nowyth rag fùndya Amsterdam Nowyth, y a dhros gansans an hanow thaler, saw in aga thavas y hèn a vedha leverys daler. I’n seytegves cansvledhen y feu Amsterdam Nowyth kemerys dhyworth an Iseldiryow ha rës dhe’n Sowson hag y a’s das’henwys Evrok Nowyth ‘New York’. Kyns napell yth esa bathow arhans Evrok Nowyth, dalers, ow mos adro in oll an tredhek gwlasva. Pàn wrug an Amerycans cafos aga anserhogneth, y a wrug dôwys daller/dollar avell hanow sodhagyl aga mona. Ytho Joachimsthal hag indella sîra wydn Jesu Crist yw cofhës in hanow mona an Stâtys Udnys.