© 2016 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In Kernowek Coth an ger rag ‘pig’ o hogh. Rag moy ès udn hogh Kernowek Coth a levery mogh. Hedna yw gwelys i’n ger losow mogh ‘hogweed’ neb a vedha kefys in ranyêth Sowsnek a Gernow avell lizzamoo. Yth o tiogow Kernow ûsys dhe ry delyow an losowen-na dhe’n mogh avell sosten. Yth hevel bytegyns fatell wrug ger aral kemeres an le a hogh ha mogh kefrÿs. An ger-na yw porhel, benthygys dhyworth an Latyn. An ger porhel yw campollys gans Lhuyd hag ûsys gans Jowan Tregear. Heb mar nyns yw alowys dhe’n Yêdhewon debry kig porhel pò ‘pork.’ Ow côwsel adro dhe franchys an Gristonyon comparys gans an Yêdhewon, Tregear a scrif: Rag nag on ny kelmys dhe vos cyrcùmcîsys, na dhe offra in bàn dhe Dhuw leuhy, ohen, deves ha gyfras na dhe vos tergweyth i’n vledhen dhe Jerùsalem, na dhe refrainya dhyworth kig porhel. Oll an geryow-na, hogh, mogh ha porhel, ymowns y ow referrya dhe vestas dov. In lien Keltek bytegyns yth yw kefys yn fenowgh whedhlow adro dhe’n badh pò torgh gwyls, ‘wild boar’ in Sowsnek, rag i’n termyn eus passys mogh gwyls o kebmyn in cosow an enesow-ma hag ûsadow an bensevygyon o aga helghya avell sport. In whedhel Kembrek Culhwch ac Olwen, rag ensampel, onen a’n oberow cales yw res dhe Culhwch collenwel yw helghya Torgh Trwyth rag cafos dhywar y bedn crîben ha gweljow pò ‘scissors’ arbednek. In Godhalek yth yw kefys whedhel pòr drist a helghya torgh wàr Ben Bulben i’n tyller may ma Conteth Sligo lebmyn. Yth yw an helgh restrys gans Diarmaid O Duibhne hag yma Finn Mac Cool gelwys dhe gemeres part ino. I’n helgh yth yw Diarmaid golies gans dens lybm an torgh gwyls. Ena Diarmaid a bës Finn dhe dhry dowr dhodho in y dhewla, rag yma sawment in dowr evys in mes a dhewla Finn. Mar kyll ev eva an dowr-na, ev a vëdh yaghhës. Ny yll Finn ankevy bytegyns fatell wrug Diarmaid ladra Gráinne, y wre’ty deg, dhyworto, ha nyns ywa pës dâ selwel Diarmaid. Saw wosa mebyon Diarmaid dhe wodros Finn, yma Finn ow mos dhe’n fenten rag dry an dowr in y dhewla dhe Diarmaid usy in newores. Yma Finn pòr ogas dhe Diarmaid saw ev a wra predery a Gráinne arta hag overcùmys yw gans envy wherow tro ha Diarmaid. Yma va ytho owth alowa dhe’n dowr resek der y vesîas. Indella yma Diarmaid ow merwel, golies gans torgh gwyls ha heb gweres vÿth dhyworth Finn mac Cool.