(401) An vledhen 2023 - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Hòm yw an kensa seythen a’n vledhen dyw vil ha try warn ugans. Mar teun ny ha perthy cov a’n taclow a wharva warleny, hèn yw dhe styrya, in dyw vil ha dew warn ugans, nena a les vÿdh dhyn gweles in pana vaner a wrowns an taclow-na dysplegya i’n vledhen-ma. Yth hevel dhybm fatell o peswar tra a les brâs warleny ha whensys oma dhe weles in pana vaner a wrowns y trailya in mes i’n vledhen-ma. An kensa yw dedhyow devedhek Donald Trùmp, presydent kyns a’n Stâtys Udnys. Trùmp a asas soodh in mis Genver mil hag onen warn ugans. Pùpprës wosa hedna yma an cortys a laha ow whythra an dyvers taclow warbydn laha gwrÿs gans Trùmp avell presydent. An qwestyons brâssa yw: Onen, a vÿdh Trùmp drÿs dhyrag an gort ha dew, a vëdh ev wosteweth tôwlys in pryson? An secùnd tra a les heb mar yw an gwerryans in Ûcrayn. Rûssya a sêsyas gorenys Crîmea i’n vledhen dyw vil ha peswardhek. Ena i’n gwaynten warleny Pûtyn a dhanvonas soudoryon aberth in Ûcrayn rag sêsya oll an pow. Ûcrayn yw stât democratek say Pûtyn a alejyas fatell o Natsys an rewlysy. Pelha ev a wrug plêntya na vydna an viaj durya ma’s termyn cot. In contrary part luyow an Ûcrayn a omdhysqwedhas moy galosek ha moy effêthus ès an Rùssyans. Pell dhyworth kelly moy ha moy tir dhe’n Rùssyans, soudoryon an Ûcrayn re wainyas tyleryow in ÿst an pow mayth esa Rùssyans an moyhariv. Governans an Ûcrayn re dhysqwedhas dhe’n bÿs nag yw re dhâ arvow an Rùssyans, spessly an tancow, ha nag yw dydrygh aga soudoryon. Apert yw lebmyn fatell yw Pûtyn whensys dhe dhewedha an omdowl mar kyll ev gwil indelha heb kelly re a dhynyta. An tressa negys a les i’n vledhen-ma yw an qwestyon a’n protestyansow in Cathay. An demonstracyons a dhalathas drefen lies huny in Cathay dhe vos sqwith a’n strothansow i’n pow rag controlya an cùrunvîrùs. Dell hevel yma governans Cathay parys dhe lowsya radn an lymytyansow reqwîrys i’n tor’-ma. Nyns yw certan bytegyns a wra an lowsyans-na hùmbrank dhe brotestyansow erel warbydn an governans y honen. Udn dra yw sur heb dowt vëth. An auctorytas Cathayan i’n dedhyow usy ow tos a vÿdn sewya oll an re-na a wrug kemeres radn in protestyansow hag y a vëdh keredhys yn lybm. An peswora negys yw an qwestyon a Bretmes pò Brexyt. Kyn leverys Borys Johnson teyr bledhen alebma fatell o res collenwel Bretmes, apert yw lebmyn na vëdh Bretmes gorfennys nefra. Yma caleterow ow longya dhe’n prôtocol in Wordhen North. Yma othem kefrÿs a wonesyjy in Breten Veur y honen. Pelha res veu dhe lies negys settya scorren in bàn wàr Vrâstir Ewrop drefen na yllens y durya heb presens ajy dhe’n Varhas Udnyk. Herwyth pùb sowndyans yma cansran a’n vôtyoryon yw faverus dhe Bretmes codhys yn uthyk. Yma adro dhe’n try ugans a’n cans ow cresy lebmyn fatell o camgemeryans gasa an Udnyans Ewopean. Dre rêson a hedna yma lies onen a barty an Mentênours certan fatell wrowns y kelly an nessa dôwysyans kebmyn.