(404) Map Melyn - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Edwin Chirgwin a veu genys in Lulyn in mis Ebrel mil eth cans naw deg dew. Dhyworth y floholeth yth esa ev in dadn hus a wonysygeth Kernow, hy istory, tradycyons hy fobel ha’y thavas. Ev a gafas adhyscans kyns oll in Scol Dëdh an Wesleyans in Lulyn hag ena ev eth dhe’n Scol Gramer Nowyth in Pensans. Ev a veu gwrÿs descador hag a wre desky in Lulyn hag in Porth Ia. I’n Gwerryans Brâs ev a servyas in Eynda hag i’n Ÿst Cres avell sodhak arwedhya. Dhyworth an vledhen mil naw cans dew deg whe erna wrug ev omdedna yth esa ev ow tesky in Scol Sent Clar. Gwrÿs veu bardh a Orseth Kernow in mil naw cans try deg dew gans an hanow bardhek Map Melyn. Warlergh hedna ev a veu scryvynyas an Orseth. Caradar heb dowt vÿth o pòr dhâ avell screfor in Kernowek hag ev a ylly screfa bardhonieth inwedh, dell woryn ny dhyworth y Trystan hag Ysolt. Saw aswonys yw Map Melyn avell an gwelha prydyth creatus a’n dasserghyans avarr. In y lyver Cornish Literature yma Brian Murdoch ow ry an text yn tien a vardhonak Map Melyn ‘An jynjy gesys dhe goll’ hag ev a lever: ‘Yth yw ton trist a’n bardhonak mar varthys avell sparuster an imajys.’ An bardhonak hirra dhyworth Map Melyn martesen yw ‘Agan Avon’, pryntys in An Lef Kernewek Kynyaf mil naw cans whe deg onen, bledhen warlergh y vernans. Yma an hanter-cans gwersyow ow côwsel adro dhe Dhowr Fowy dhyworth hy derevyans bys may whra hy resek in mes i’n mor. Yma pùb gwers ow rîmya abab hag yma peswar pooslev in kenyver lînen. Yma Agan Avon ow tallath indelma:

Ow tynkyal hag ow cana dre an cors

in gwir haval dhe vaban yw;

lynn carnak cul hy fordh, na fors

hy bodh hy honen hy a sew.

Yma an prydyth ow compla fatell usy an ryver ow terevel ryb Roughtor wàr Woon Brèn hag yma va owth hevelly an meneth-na dhe Sînay, le may whrug Moyses metya gans Duw ha kemeres an laha dhyworto. Ena dell lever an prydyth yma an dowr ow resek dres dowrlabm Golytha. Yma an prydyth ow teclarya fatell yw an tyller-ma mar deg nag eus spâss vÿth gesys rag pegh:

Pùb cammweyth omma eus in colon den

skeus gwag yw. Nyns yw le vÿth oll

rag pehosow, gorthevys yw yn fen

dres oll an norvÿs, bre ha dol.

Wàr an dyweth yma an ryver ow mos in mes i’n mor. Saw obma whath yma an prydyth ow predery a begh mab den. Ev a lever:

Awotta ewon avell mana gwynn

a goodh in agan kerhyn ny;

leun-venneth wàr an plâss yth hevel dhymm

ny yll bos bÿth well penytty.

Hag yma va ow tewedha y vardhonak indelma:

Y teu in aga thermyn hanter-nos

tewolgow, henys, ha finweth;

heb son vÿth yw an melyn, meur hy thros,

kellys yw bêwnans in stlaveth.

Tôkyn crev ytho yw resegva an ryver a vêwnans mab den. Kyn nag yw perfeth yn tien an bardhonak-ma, res yw avowa fatell ywa fest galosek.