© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In y erlyfrow rag ‘brick’ yma Nance ow ry dew er: men pry ha bryck. Nyns yw an lavar men pry kefys in tyller vëth i’n tavas hengovek saw yth yw bryck destys i’n Kernowek Cres. I’n gwary Creacyon an Bÿs Seth, tressa mab Adam, a wor dre sterdhewynieth fatell usy lîvyow ow tos dhe dhystrôwy an bÿs. Rag hedna yma va ow qwil dew byllar, onen a vryckys ha’y gela a varbel; inhans y ev a wra settya oll lyfrow a’n bÿs ma na vowns y kellys in termyn an dystrùcsyon. Seth a lever:
Dew byllar mannaf poyntya
rag an porpos-na wharê
bryck ’vÿdh onen anedha
ha marbel ’vÿdh y gela.
An pyllar a varbel a vydn gwetha an lyfrow dhyworth glaw ha’n pyllar a vryck a vydn gwetha an lyfrow dhyworth tan. Pàn usy auctour Creacyon an Bÿs ow compla bryck ha men, yma va ow predery a’y dhedhyow y honen. Saw yma an mater in qwestyon intendys dhe referrya dhe oos an Beybel. I’n termyn an Beybel in gwiryoneth y fedha bryckys gwrÿs a bry ha cala dredho. An cala a vydna encressya nerth an bryckys ha’ga gwil êsya dhe shâpya. Ûsadow kebmyn o i’n Ÿst Cres gwil bryckys ha cala dredhans. Yma exampyl pòr dhâ a hedna i’n Beybel, i’n secùnd lyver ino gelwys Exodùs. Yma Farô ow perthy own a’n Israelysy. Rag compressa mebyon Israel hag indella aga sensy in dadn y arlottes, ev a gomondyas dh’y offycers na wrellens ry cala vëth dhe’n Israelysy dhe wil bryckys. Farô a lever: Ny rewgh why ry cala na fella dhe’n bobel dhe wul bryckys, kepar hag i’n termyn eus passys; gwrêns y mos rag cùntell cala ragthans aga honen. Saw why a wra reqwîrya dhywortans an keth nùmber a vryckys dell wrêns kyns lebmyn; ny wrewgh why y lehe poynt, rag diek yns y. I’n dedhyow-na an bryckys a vedha sehys i’n howl dell o ûsys, saw traweythyow bryckys pry a vedha pebys in sorn. Nebes mîsyow alebma me a wrug recordyans adro dhe Dour Bâbel. Dell hevel y feu an tour-na growndys wàr zygùrat Babylôn. Zygùratys o templys pedrak a lies leur, tenwednow pùb leur o ledan awoles hag idn avàn. Y hylly bos inter dew leur ha seyth leur in kenyver zygùrat. Y fedha bryckys howlsehys wàr jy saw y fedha bryckys pebys in sorn wàr an tenwednow avês rag crefhe an templa. Yth yw bryckys howlsehys in ûsyans whath pò dhe’n lyha bys i’n dewetha cansvledhen. Rag ensampyl in Mali in North Afryca in valy Dowr Bani yma Mosk Brâs Djenné. Y feu an present mosk derevys i’n vledhen mil naw cans ha seyth. Gwrÿs ywa a vryckys howlsehys saw yma plaster wàr an fosow, rag ry semlant smoth dhodhans. Yth yw an mosk in Djenné an byldyans brâssa a vryckys howlsehys in oll an bÿs. Hag ot obma neb tra aral: in Spaynek an ger rag bryck sehys i’n howl yw adobe. Kynth yw hedna y styr gwredhek, hedhyw i’n jëdh yth yw an ger adobe ûsys yn fenowgh rag descrefa gîss a benserneth kebmyn in Soth-West a’n Stâtys Udnys.