(412) 'In' in Kernowek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma an rag-ger pò ‘preposition’ in in Kernowek dre vrâs ow styrya ‘in’ in Sowsnek. Ot obma nebes examplys in mes a’n textow: in nev ny vedhyth tregys (Passyon agan Arlùth); an sherewys a dregas in iffarn in torment crev (Passyon agan Arlùth); in chy Duw ny goodh marhas termyn vÿth oll (Passio Christi). Yth yw in ûsys kefrÿs gans henwyn tyleryow rag ensampyl: In Kernow me a’m bëdh chy (Bêwnans Meryasek); In Rom me yw senator acontys an gwelha gour (Bêwnans Ke); an Tempel Cres in Loundres in Pow an Brethon (Gwavas); th’era trigys in Seleven den ha benyn in teller cries Chy an Hordh (Boson). Yth esa Nance ow cresy y hylly an rag-ger dhe bos ûsys dhe vênya ‘at’ gans hanow tyller. Hèn yw cabm; in yn udnyk yw ewn. Yma in ‘in’ ha’n ger mell an warbarth ow qwil i’n screfys gans syllgoll pò ‘apostrophe’ dhyrag an n. Yth yw hedna ûsys in Kernowek kepar hag ‘in the’ in Sowsnek, rag ensampyl: An pryncys esa i’n pow gans Jûdas (Passyon agan Arlùth); why re dheuth dhymm gans arvow, gans fustow ha cledhydhyow kepar ha pan ven avy an purha lader i’n pow (Passio Christi); my a vynn lemmyn orna mab lien ow sel pryva dhe vos epscop i’n templa (Origo Mundi). Yma dyffransow bytegyns ow tùchya an devnyth gwrÿs a’n rag-ger in in Kernowek hag ‘in’ in Sowsnek. Yma Kernowek owth ûsya in yn fenowgh pàn usy Sowsnek ow leverel ‘on’. Rag ensampyl Sowsnek a lever ‘on the road’, ‘on the mountain’ hag ‘on the cross,’ saw yma Kernowek owth ûsya in i’n câssys-na. Merowgh orth an examplys-ma: Fatell wrussyn ny kêwsel orth an Arlùth ker Jesu ha metya orto hedhyw i’n fordh certan (Resurrexio Domini); Now lemmyn deun i’gan fordh (Bêwnans Meryasek); Ha’n re-na a wrella indella, ymowns yn sur i’n fordh a salvacyon (Tregear); ewgh sacryfiowgh yn scon i’n meneth dhe’n Tas a’n nev (Origo Mundi); Yma ev i’n meneth brâs dell glôwaf vy sur mil pâss dhyworth an grônd awoles (Bêwnans Meryasek); ty a wor in pùb maner fatell veu ow mab ledhys i’n grows inter dew lader (Resurrexio Domini); an lel gig agan Arlùth Crist a veu gorrys i’n grows, marow hag encledhys (Sacrament an Alter). Ot obma poynt aral: in Sowsnek ny a lever ‘in the world’ saw ‘on the earth’. Kernowek bytegyns a lever i’n bÿs hag i’n norvÿs. Ot obma examplys mes a’n textow: nyns eus mytern dhyn i’n bÿs (Passio Christi); ha Peder o an vycar a Grist omma i’n bÿs (Tregear); saw me a garsa i’n norvÿs-ma pùb eur socra bohojogyon (Bêwnans Meryasek) hag ev a’n gwrug mytern hag emprour i’n norvÿs (Tregear). Yth yw an rag-ger in in Kernowek ûsys kefrÿs gans certan geryow dhe styrya ‘as’. Ot obma nebes examplys: ha pòr hardh a wovynnys corf Jesus worto in ro (Passyon agan Arlùth); in amendys a’th pehosow orden bos gwrës templa golow brâs ha ledan (Origo Mundi); peb oll wàr benn y dhêwlin a gan in gordhyans dodho (Passio Christi); in tokyn a gerensa amma dhywgh oll me a vynn (Bêwnans Meryasek); in dewhelyans pehosow gwethyl alter me a vydn (Creacyon an Bÿs).