© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Teylu Peugeot o anedhys in randir Montbéliard, Franche-Comté, Frynk. An gowethas a’s teva tedhla dur pò ‘steel foundry.’ Fùndyor an gowethas o Armand Peugeot, Protestant, hag ev a veu genys in cres an nawnjegves cansvledhen. Wostallath Peugeot a wre provia heskednow ha toulys erel. Ena an gowethas êth in rag dhe ascor dywrosow. Rag an kensa prÿs i’n vledhen mil eth cans naw deg Peugeot a wrug carr jyn loskvan aberveth. Yth esa jynys gwrÿs gans Daimler in kerry Peugeot. Whe bledhen warlergh hedna Peugeot a wrug aga kensa jyn aga honen. Warbydn dallath an ugansves cansvledhen yth esa Peugeot ow qwil hanter an kerry tan gwrÿs in Frynk. Peugeot a dhalathas gwil kerry kestrif inwedh, saw pàn dheuth Kensa Gwerryans an Bÿs, an gowethas a drailyas dhe wil daffar omlath. I’n vledhen mil naw cans dew dheg eth y feu egerys aga gweythva i’n dre gelwys Sochaux ha hodna a remainyas aga chif-tyller ascoryans dres lies bledhen. Yth esa teknologieth kerry tan Peugeot pùpprÿs ow tysplêgya. I’n vledhen mil naw cans pymp deg pymp Peugeot a dhalathas gwertha kerry tan i’n Stâtys Udnys. I’n vledhen mil naw cans seyth deg pymp Peugeot a wrug perhenegy Citroën, cowethas esa in caletter brâs. Teyr bledhen warlergh hedna Peugeot a gemeras dhodhans aga honen an scoren Ewropean a Chrysler. I’n present termyn yth yw cowethas Peugeot gelwys Stellantis. Y yw perhenogyon a’n markys-ma: Peugeot, Citroën, Maserati, Chrysler, Fiat, Lancia hag Alfa Romeo. Hedhyw i’n jëdh yth yw kerry tan Peugeot gwerthys dres oll an bÿs hag yth yw aswonys dâ arweth an mark: lion rampyng. Devedhyans an arweth-na yw a les ino y honen. Orth dyweth an tredhegves cansvledhen Ottô, Cont Borgayn a wrug settya adenewen y gôta arvow esa er pò ‘eagle’ warnodho. In le an edhen ev a gemeras dhodho y honen scochon esa lion warnodho. An er o edhen hengovek an Emprour Sans Roman; ha pàn worras Ottô dhyworto an scoos esa er warnodho, yth esa ev ow teclarya ev dhe vos ow kescar y honen yn tien dhyworth y soveran, an Emprour. Wosa hedna an côta arvow esa an lion warnodho o an scochon degys gans oll y sewysy. I’n dedhyow arnowyth y fedha an scochon-na ûsys avell arvbows Franche-Comté. Yma Franche-Comté i’n keth tyller avell conteth Borgayn i’n Osow Cres. Tro ha dyweth an nawnjegves cansvledhen an scochon gans an lion warnodho a veu adoptys gans cowethas Peugeot avell arweth an kerry tan esens y ow qwil. Y a adoptyas an scoos-na drefen chif-plâss kerry tan Peugeot dhe vos in Sochaux, in Franche-Comté. Na ve Ottô Cont Borgayn dhe genkya gans an Emprour i’n tredhegves cansvledhen, ny via an lion in ûsyans gans Cowethas Peugeot. In le a hedna arweth Peugeot a via er an Emprour Sans Roman. Saw orth dallath an ugansves cansvledhen prenoryon kerry tan Peugeot a wrussa cresy an er-na dhe vos er gwlascor Prùssya. Hag yn certan y a via diegrys der an preder. Res yw avowa bos lion contys Borgayn an arweth berfeth rag symbol kerry Peugeot.