(415) 'Within, inside' in Kernowek

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Rag ‘into’ Kernowek a lever aberth in, rag ensampyl: Cres Duw aberth in chy-ma (Passio Christi); kê aberth i’n pow dhe wandra unn pols bian (Resurrexio Domini); aberth i’n bedh dell re’th worsyn, penn vyghterneth (Resurrexio Domini); an Jowl a’n kemeras i’màn aberth i’n cyta venegys (Rowe). Rag an adverb ‘inside’ gans môcyon ny a yll leverel aberveth: henna a wra gwetha na dheffo glaw aberveth (Origo Mundi); in hanow an Tas gwelha deun aberveth desempys (Origo Mundi); kê aberveth i’n castel adhyragof my a’th pÿs (Resurrexio Domini); Kê aberveth, te harlot! i’n pryson in mesk preves (Bêwnans Ke). Yth yw an rag-ger completh ajy dhe ûsys rag styrya ‘into, within.’ Otobma nebes a’n lies exampyl i’n textow: hy hemeres my a wra ajy dhe’n gorhal toth brâs (Origo Mundi); mara kylla entra ajy dhe’n yet re’m lowta ev a wra dhyn ny droktro (Resurrexio Domini); bÿth ny dheuth ajy dhe’n yet (Resurrexio Domini); ny vanaf alowa ky pòr certan ajy dhe’m tir (Bêwnans Meryasek). Merkyowgh fatell yll an ger ‘within’ in Sowsnek referrya dhe’n termyn may fÿdh neb tra gwrÿs, rag ensampyl ‘within a week’ pò ‘within ten years.’ Rag an mênyng-na in Kernowek ny a yll ûsya ajy dhe: ajy dhe ewha an jëdh in paradys ty a sev (Passio Christi); henna o ajy dhe nebes bledhynnyow awosa y dhe recêva an Spyrys Sans (Tregear); why a wel ajy dhe spâss der livyow a dhowr a’n brâssa oll an bÿs a vÿdh budhys (Creacyon an Bÿs). Saw in Kernowek rag an styr-na kefrÿs ny a yll ûsya an lavar: kyns penn: rag ensampyl: me a’n dreha sur arta kyns penn treddÿth (Passio Christi); rewardys ty a vÿdh adhyworthyf vy re’m fydh sur kyns penn vis (Passio Christi). Rag leverel ‘inside, internal’ ny a vydn leverel wàr jy; rag ensampyl ny a res dhyn dysqwedhes agan dâder wàr jy i’n golon (Tregear). Yma wàr jy ena ow cortheby dhe’n lavar wàr ves ‘outside, external’ rag ensampyl in indella mayth yw certyfies… agan syght ny wàr ves (Tregear); dre racha ny a yll ùnderstondya an sîn wàr ves ùttrys in mes dre anger (Tregear). Ha wàr an dyweth fatla yllyn ny leverel ‘inside and out?’ Yma fordh hir rag hedna: avês hag ajy yn tâ gans pêk bedhens stanchurys (Origo Mundi). Saw ny a yll gwil devnyth a versyon cot inwedh: ny vÿdh skians vÿth i’n bÿs mès y aswon ev a wra der an planettys mes ha chy (Creacyon an Bÿs).