(42) Pann Môssùl - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma lies sort pann pò ‘material’ campollys i’n textow Kernowek: owrlyn ‘silk’ ha cendal ‘fine linen’ i’n Ordinalia rag ensompel. In Bewnans Ke yth yw mencyon gwrës a’n pannow-ma in mesk re erel: damask, pùrpùr, satyn ha velvet. Nyns eus referens vÿth dhe goton i’n textow Kernowek, dre rêson martesen nag usy plans an coton ow tevy in north a Ewrop hag ytho nag o va kebmyn i’n enesow-ma dhyrag an seytegves cansvledhen. Sort a goton arbednyk yw muslin nag yw hanow ragtho kefys in Kernowek naneyl. Yma an ger muslin dhe gelmy gans an cyta a Môssùl in Irâk hedhyw rag hèn o an tyller may whrug marchons Ewropek metya gans an pann rag an kensa prÿs. An term Kernowek comendys rag muslin yw pann Môssùl, saw res yw dhyn remembra pùpprës fatell usy pann Môssùl ow styrya ‘the cloth of Mosul’ kyns ès ‘cloth of Mosul’ yn sempel. Dell hevel an gwella sort a bann Môssul a vedha gwrës i’n pow adro dhe Dhaka, hèn yw dhe styrya in Bangla Desh hedhyw. Ny dhalathas pann Môssùl bos ûsys yn kebmyn in Ewrop bys i’n êtegves cansvledhen hag yth o pobel Italy neb a lesas devnyth pann Môssul dhe bowyow erel Ewrop. An ger Italek rag pann Môssùl yw mussolo hag yth hevel fatell o hendasow Benito Mussolini marchons pann Môssùl i’n dedhyow coth. Ny a wor pana gebmyn o pann Môssùl in Breten Veur orth dyweth an êtegves cansvledhen dhyworth novelys Jane Austen. I’n novel Abatty Northanger, pò Northanger Abbey pàn vo Catherine Moreland, goroures an whedhel, ha’y howethes Mêstres Allen presentys dhe Henry Tilney, Mestres Allen a wovyn orto: “Esowgh why ow convedhes adro dhe bannow Môssùl, a syra?” Henry Tilney a’s gorthyp yn cortes hag a lever, “Pòr dhâ in gwir. Yn fenowgh y whrug ow whor vy fydhya dhymm an dêwys a bows dhedhy. Me a brenas onen rygthy nebes dedhyow alebma ha pùb benyn yonk neb a welas an bows a’s declaryas dhe vos bargen uthyk dâ. Ny wrug avy tylly ma’s pymp sols an lath rygthy ha hy o gwir-bann Môssùl dhyworth Eynda.” Nyns yw marth ytho Catherine Moreland dhe godha in kerensa gans Henry Tilney stag ena. I’n dedhyow-na ny ylly mowes yonk heb codha in kerensa gans den yonk a wodhya kebmys adro dhe bann Môssùl.