(422) Blanche Monnier - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Whedhel kebmyn lowr i’n lien yw hebma: den yonk ha benyn yonk in kerensa gans y gela saw ny yllons y demedhy awos aga theylu dhe sevel warbydn an maryach. Exampyl dâ yw whedhel Rômeô ha Jûlyet. Ny yll an caroryon yonk demedhy drefen y dhe longya dhe dhew deylu, Montagû ha Capùlet, yw eskerens mortal an eyl dh’y gela. Nyns yw whedhel Rômeô ha Jûlyet ma’s fuglien. Ot obma bytegyns whedhel a wharva in gwyrioneth. Blanche Monnier a veu genys in cres an nawnjegves cansvledhen in Poitiers, Frynk. Hy theylu o a’n haute bourgeoisie neb o kelmys gans an nôbylta. Hy a’s teva udn broder Marcel o cotha agessy. Blanche o pòr sêmly ha hy a gafas lies tantor. Yma skeusednow dhe gafos usy ow tysqwedhes benyn yonk a’n tecter brâssa. Pàn o Blanche seyth warn ugans bloodh, i’n vledhen mil naw cans seyth deg whe hy a garsa demedhy gans atorny bohosak nag o hy mabm pÿs dâ ganso. Hy mabm a veu serrys dre dhespît hy myrgh hag a’s degeas in dadn naw alwheth in rom munys tewl in tâl aga chy. Hy ha’n broder a’s sensas i’n keth chambour-na dres pymp warn ugans bledhen. An vabm ha’n broder a bêsyas gans aga bêwnans kenyver jorna, ow fâcya y dhe vos trist awos Blanche dhe vos mes a wel. Ny wodhya den vÿth a gowethesow Blanche pleth esa hy ha’n den a garsa Blanche demedhy a verwys yn sodyn naw bledhen wosa hy bos prysonys. In mis Mê mil naw cans hag onen Atorny Jeneral Parys a recêvas lyther heb hanow a dherivas dhodho adro dhe brysonyans Blanche gans hy mabm hy honen. An lyther a leverys: “Monsieur, yma dhybm an onour dhe dherivas dhywgh a wharvedhyans poos dres ehen. Yth esoma ow côwsel a venyn dhydhemeth neb yw prysonys in chy Madame Monnier, hanter-marow dre nown hag ow pêwa wàr wely poder nans yw lebmyn pymp bledhen warn ugans—wàr verr lavarow in hy mostethes hy honen.” Nyns yw godhvedhys pyw a screfas hag a dhanvonas an lyther. Dre lycklod an auctour o den yonk esa ow kerdhes in mes gans onen a’n mowysy servya in chy teylu Monnier. Ev a dhescas adro dhe stât Blanche dhyworth an servyades hag a dhetermyas gwil dhe’n creslu godhvos a’n câss. Yn scon warlergh cafos an lyther, an creslu a veu erhys dhe dhelyfrya Blanche hag y feu leverys na ylly bos descrefys hy stât uthyk ha flerys. Mabm Blanche a veu dalhednys dystowgh gans an creslu. Saw hy a veu clâv heb let hag a verwys dyw seythen warlergh hedna pàn welas hy rûth serrys avês dh’y chy. Y feu Marcel drÿs dhyrag an gort saw ev a veu fries wàr appêl rag ev a veu jùjys dhe vos anteythy in y vrÿs. Blanche hy honen a veu dyscudhys dhe vos ow sùffra muscogneth heb sawyans. Hy a veu anedhys in foljy i’n cyta Blois, le may ferwys hy warlergh dewdhek bledhen. Heb mar nyns o mabm Blanche frank dhyworth muscogneth. Nyns o hy gwrians a brysonya hy myrgh tôkyn a venyn yagh hy brÿs.