(427) William Pryce - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

William Pryce o mab an Doctour Samùel Pryce, Redrudh, ha’y wreg, Cattern Hill. Ev a veu genys in seytek try deg pymp. Yth o William Borlase y êwnter wydn abarth mabm. Pryce a veu gesys omdhevas in y yowynkneth hag y whrug Felyp Webber a Arwednak gwythresa avell y wethyas. William a levery fatell studhyas ev anatomy in dadn Jowan Hùnter ha dhyworth an vledhen mil seyth cans pymp deg in rag ev a wre practycya avell chyrùrjen hag apotecary in Redrudh. Pryce a’n jeva kevran vian in Poll Cober Dor Coth. Dres deg bledhen ev a wre gorra mona aberth in negys an poll sten ha cober ryb Dor Coth. Yth esa an secùnd bal-na ogas dhe dyller gorsaf Redrudh agan dedhyow ny. Pryce a dhemedhas gans Mêstresyk Mitchell, Redrudh. Ev a asas dew vab, Wella ha Samùel Vyncent, hag y aga dew a veu chyrùrjens in Redrudh. Yn scon wosa an vledhen seytek seyth deg eth Pryce a veu gwrÿs Medhek Fysek dre Warek (‘MD by Diploma’) hag a veu dôwysys kesvroder a Cowethas an Antyqwarys a Loundres. I’n vledhen seytek seyth deg eth Pryce a dhyllas lyver brâs, Mineralogia Cornubensis. Hèn o studhyans a whelyow olcan in Kernow. Compassus lowr yw an lyver rag yma va ow tyghtya istory ha practys stenoryon ha paloryon olcanow erel. Onen a’n taclow moyha a les i’n lyver yw y acownt a jyn Newcomen rag pùmpya dowr in mes a’n poll. An lyver-na a veu daspryntys i’n cansvledhen-ma. Secùnd lyver William Pryce o Archæologia Cornu-Britannica, a veu dyllys in bledhen y vernans. Meur a’n lyver yw an radnow adro dhe’n tavas Kernowek in mes a Archæologia Britannica, dyllys peswar ugans bledhen moy avarr gans Edward Lhuyd. Dell lever Pryce in raglavar y ober, ev a gafas an radn vrâssa a’y lyver dhyworth trailyans Gwavas ha Tonkin a ober gwredhek Lhuyd. Saw yma lies tra in lyver Pryce na gefyr gans Lhuyd. Rag ensampyl yma va ow ry dhybm gwersyow ha desmygow Kernowek na gefyr in ken tyller vÿth. Yma ganso rol inwedh a henwyn tyleryow in Kernow warbarth gans y styryans ev anodhans. Res yw avowa nag yw compes meur a’n re-na. Yma va ow ry kefrÿs bardhonogow gans Jamys Jenkyns ha’n text a’n gân Ple erowgh why ow mos, versyon Kernowek a ‘Where are you going my pretty maid?’ Orth dyweth an lyver yma Pryce ow pryntya lytherow dhyworth Edward Lhuyd dhe Vêster Thomas Tonkyn. Martesen yth yw an dra moyha a valew in oll an lyver an erva Kernowek - Sowsnek. Apert yw fatell gavas Pryce meur a’n geryow in mes a Archæologia Britannica ha radn anodhans dhyworth Borlase. Saw yma geryow in lyver Pryce na gefyr in tyleryow erel, rag ensampyl: berryk ‘fat’; cronogas ‘hop like a frog’; dëdhtardh ‘daybreak’; egor jarn ‘garden daisy’; fugya ‘to dissemble’; gossen ‘feruginous earth, rust’; lewes ‘lioness’ ha sugalek ‘field of rye.’ Wàr an dyweth yth eson ny in kendon dhe Pryce rag an lavar coth-ma: Stên Sen Agnes yw an gwelha sten in Kernow. William Pryce a verwys in mis Kevardhu seytek naw deg hag a veu encledhys in Redrudh.