© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Animal Farm gans George Orwell o parys dhe’n wask orth dyweth an vledhen nawnjek peswar deg try. Mès ny veu an lyver dyllys bys i’n vledhen peswar deg pymp. Tîtel an lyver yw ‘Animal Farm: a fairy story.’ Saw whedhel fayes nyns yw an lyver poynt. Mockyans anwhek yw a gomûnystieth an Udnyans Sovyetek. An narracyon yw derivys in form a alegory: Yma oll an bestas in Manor Farm drogpÿs gans aga bêwnans cales in dadn an tiak cruel. Ymowns y ow rebellya hag ow spêdya dhe fêsya an tiak. Ymowns ow settya in bàn bargen tir avell aga fosessyon aga honen. Dhyworth an dallath yth yw an mogh aga hùmbrynkysy, spessly dew vora, Napoleon ha Snowdrop. Ny yll an dhew-na agria an eyl gans y gela hag yma Napoleon ow soweny dhe exîlya Snowdrop. Warlergh hedna pàn wrella tra vÿth fyllel pò pàn wrella droktra wharvos, Napoleon ha’y gowetha, a lever bos Snowdrop dhe vlâmya—kynth yw Snowdrop departys termyn pell. Nebes ha nebes yma an bargen tir ow soweny, saw nyns yw an spêda a weres vÿth dhe’n bestas. In gwiryoneth aga bêwnans yw gweth ès dell o dhyrag an rebellyans. Pelha yth yw oll penrêwlys spladn an rebellyans ankevys an eyl wosa y gela. Wàr an dyweth nyns yw gesys ma’s udn bednrêwl yn udnyk: Oll bestas yw eqwal, saw yma radn anodhans moy eqwal ès re erel. Apert yw dhe’n redyor fatell usy person Napoleon i’n alegory ow referrya dhe Stâlin ha Snowdrop dhe Trotsky. Orwell a dhanvonas text y novel dhe beswar dyllor dyffrans, saw y oll a sconyas dh’y dhylla. Res yw perthy cov fatell esa an Vreten Veur i’n termyn-na owth omlath warbydn an Natsys in kefrysyans gans Stâlin ha’n Udnyans Sovyetek. Onen a’n dhylloryon a dhysqwedhas an text dhe’n Menystry a Enwedhow (‘Ministry of Information’) ha’n Menystry a gùssulyas heb y dhylla. Ny via fur, yn medh an Menystry, gorra in mes whedhel esa pyctour mar anwhek ino a Stâlin ha’y gowetha in form a borhelly. An gwiryoneth yw na veu dyllor vÿth lettys gans governans Breten Veur dhyworth dylla Animal Farm, saw yth o an comen voys i’n pow i’n termyn-na dhe ascûsya hager-oberow an Udnyans Sovyetek. An dyharas-na rag Comûnystieth Rùssya a bêsyas in radn bys in sùppressyon rebellyans Ûngary in nawnjek pymp deg whe. Kyn na wrug Orwell bythqweth vysytya Rùssya, ev a welas practys an comûnystyon pàn esa ev in Spayn i’n bledhydnyow try ugans owth omlath rag an Repùblyk warbydn Francô. Kettel wrug dewedha Secùnd Gwerryans an Bÿs in Ewrop, y feu Animal Farm dyllys ha gans spêda vrâs. Y feu gwerthys lies copy in lies tavas. Rag an kensa prÿs in y vêwnans Orwell o rych. I’n gwetha prÿs nyns o va yagh, rag yth esa ev ow sùffra gans cleves skevens pò ‘tuberculosis.’ Ev a verwys i’n vledhen nawnjek pymp deg hag ev seyth ha dewgans bloodh. Kyn na veu Animal Farm yn tien trailys dhe Gernowek, an kensa chaptra a yll bos gwelys in Kernowek wàr wiasva Skeul an Tavas in dadn an tîtel Amêthva an Bestas.