(440) Petrok Sans - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Petrok o sans a’n eglos Keltek ha devocyon dhodho o fest ledan. Y hanow yw growndys wàr an wredhen Petr ‘Pedyr’ ha’n gorfen ger -ok; rag hedna Petrok yw ‘Pedyr bian.’ Yma moy ès udn versyon a’y vêwnans gesys dhyn. In onen anodhans yth yw leverys fatell o va mab Glywys, mytern Glywysing, ha broder Gwynlliw, tas Cadoc pò Casak sans. Glywysing yw hanow coth rag Morganûg in Soth-Ÿst a Gembra. Yma tradycyon kefys adro dhe Pedrok, fatell o va soudour kyns ès ev dhe vos managh. Yth yw leverys fatell o va onen a’n seyth den a vêwas dres Cas Camlan, hèn yw batel dhewetha Arthur Mytern gans Modres traitour. Pàn dhetermyas ev bos managh, gans try ugans den nôbyl erel ev êth dhe Wordhen dres ugans bledhen. Y a dhewhelys dhe heyl Dowr Camel. Ena epscop gelwys Wedhenek a’s recêvas yn larj ha ry y gell dhodho. Yma hedna ow clerhe fatell yw Lanwedhenek an hanow Kernowek rag an tyller aswonys in Sowsnek avell ‘Padstow’ usy ow tos dhyworth ‘Petrocstow’. Petrok ha’y gowetha a vêwas yn sempel dres deg warn ugans bledhen. I’n eur-na y êth wàr brierynsys dhe Rom ha dhe Jerùsalem. Alena, herwyth an istory, y êth dhe Eynda hag a vêwas wàr enys i’n Ëst dres seyth bledhen pàn na gafsons avell sosten ma’s udn pysk. Gwarnys gans el y a dhewhelys dhe Gernow hag a dhelyfryas an pow dhyworth sarf uthyk. An sarf o sensys gans rêwlyor cruel gelwys Tewdar rag pùnyshya drog-oberoryon. Ena Petrok a appoyntyas coweth avell abas a’y vanaghty ha mos gans dewdhek dyscypyl dhe vêwa i’n gwylfos—dre lycklod in Nans Fenten (‘Little Petherick’). Ena Petrok a sawyas carow helhys gans den gelwys Constantîn hag a drailyas an helhor dhe’n fedh Gristyon. Ena Petrok êth in rag dhe’n tressa tyller mayth o tregys den gelwys Wùron. Wùron a dhepartyas hag a asas an tyller dhe Petrok; hag ev a fùndyas ena an tressa managhty. Hèn o Bos Venegh pò in Sowsnek ‘Bodmin.’ Petrok a verwys an peswora Metheven in Lanwedhenek. Ha ryb y vedh yma fenten a dhowr bew; mar pÿdh fedh lowr dhe nebonen, dowr an fenten a wra yaghhe y lagasow ha cleves in y vody. Yth hevel lies bledhen warlergh mernans Petrok fatell wrug an radn vrâssa a’y venegh chaunjya chy dhyworth Lanwedhenek dhe Bosvenegh hag y a dhros gansans creryow an sans. Dell hevel y feu an môvyans-na provôkys der assaultyans an Vîkyngas; rag yma Lanwedhenek wàr an cost saw Bosvenegh wàr geyn pow ha pelha dhyworth assaultyans morladron. Yma lies tyller aral in Kernow may fedha onourys Petrok, rag ensampyl Eglos’heyl ha Trevelgy. Dhyrag an Reformacyon tus an pluwyow a Bosvenegh, a Lanwedhenek hag a Nans Fenten a wre kerdhes in processyon gans crowsyow ha banerow dhe dyller ogas dhe Wâd rag goslowes orth pregoth. Devôcyon dhe Petrok sans a dhalathas lêsa in mes a Gernow mar avarr avell an nawves cansvledhen. Ev a vedha complys in letanys in Peneglosyow Keresk ha Kerwyns (‘Winchester’) rag ensampyl. Hag in Breten Vian yth yw sacrys dhodho an eglosyow a Lopérec, Saint Pétreux, Saint Perreux ha Saint Pérec.