(441) An Jùjment a Parys - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In mythologieth an Grêkys an pryns mortal Pelews a dhemedhas an dhuwes Thetys. Oll an duwesow marnas onen a veu gelwys dhe’n solempnyta. An dhuwes na veu gelwys o Erys, duwes an strif, rag nyns o hy kerys gans duw na den. Hy a dheuth dhe’n fest bytegyns hag a dowlas in mesk an gyffewysy aval a owr ha screfys warnodho an geryow “dhe’n dhuwes tecka.” Teyr duwes a wrug plêntya hy hy honen dhe dhendyl an aval: Athênê, duwes an skentoleth; Hêra, gwre’ty Jûpyter; hag Afrodîtê, duwes an gerensa. Y oll a besys Jûpyter dhe dhetermya pyw o an decka intredhans, saw nyns o va whensys dhe vos jùj. Ev a dheclaryas fatell wre Parys jùjya an negys. Parys o den mortal dhyworth cyta Troya. Dell hevelly, Parys a dhysqwedhas jùstys perfeth kyns an termyn-na in kestrif inter y darow y honen ha tarow Arês, duw an gwerryans, rag Parys a ros an gober dhe darow an duw. Parys a vedha gelwys Alexandros traweythyow inwedh hag ev o mab Priam, mytern Troya. An teyr duwes a omwolhas in fenten Îda hag ena metya gans Parys. Pàn esa Parys orth aga whythra, kenyver onen anodhans a whelas y vrîbya. Hêra a offras dhodho y wil mytern Ewrop hag Âsya. Athêna a offras dhodho skentoleth ha codnek in gwerryans. Afrodîte a offras dhodho an venyn decka in oll an norvÿs. Parys a dhôwysas Afrodîtê. An venyn deg complys gans Afrodîtê o Helen, gwre’ty Menelaws mytern Sparta. Parys a wrug golya dhe Sparta ha Parys o mar sêmly may whrug Helen codha in kerensa ganso. Pàn o Menelaws gyllys a dre, Parys a gemeras Helen ha dewheles gensy dhe cyta Troya. Pàn dheuth Menelaws tre ha desky fatell o y wreg gyllys gans Parys, ev a dherivas an mater dh’y vroder Agamemnon, mytern Mycênê. Chyftens an Grêkys a gùntellas morlu ha golya dhe Troya. Hèn o dallath Gwerryans Troya. Yth yw an omlath-na descrefys in mesk tyleryow erel in Îliad Hômer. Îlyùm o ken hanow rag Troya. Wostallath nyns o Odyssews, mytern Ithaca, pÿs dâ dhe gemeres radn i’n caskergh, rag profusys o an gwerryans dhe dhurya deg bledhen hag ev y honen dhe wandra adro dhe’n Cresvor deg bledhen moy. Ev êth bytegyns dhe Troya, ha desmygy an fordh dhe dhewedha gorheas Troya gans an Margh Predn. Pàn êth Parys kyns oll dhe Sparta, ev o demedhys solabrÿs dhe Ênônê, benyn fest codnek in medhegieth. I’n gwerryans Parys a veu golies poos ha dos dhe Ênônê, y wreg forsâkys, ha’y fesy dh’y sawya. Ênônê a’n sconyas hag ev a verwys. Warlergh hedna Helen a veu reconcîlys gans Menelaws, hy gour ty. Yma meur a lien growndys wàr whedhel Gwerryans Troya. Yth yw gorheas Troya ha mernans Hector, broder Parys orth dêwla Akylês, derivys i’n Îliad. Gwandrans Odyssews yw devnyth an Odyssey. Pelha yma gwredhyow Eneyd Vyrjyl, ha gwredhyow fug-istory Jeffry Menow dhe whelas in vyctory an Grêkys warbydn cyta Troya. Apert yw ytho fatell wrug jùjment Parys sordya lies whedhel i’n Bÿs Auncyent. Pelha Jùjment Parys o devnyth lies pyctour paintys rag ensampyl gans Botticelli, Cranach, Rubens, ha Renoir.