(444) Non Sans - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Herwyth Bêwnans Dewy Sans, Non mabm Dewy o lenes in lenjy Ty Gwydn ogas dhe Porth Mawr (‘Whitesands Bay’), Penvro, Kembra, neb termyn i’n whefes cansvledhen. Hy a veu sêsys ha defolys gans certan pryns i’n côstys-na. An bêwnans a lever fatell o Sant, mytern Keredygyon an den cablus. Yth yw reportys kefrÿs fatell dheuth ev warnedhy pàn esa ev ow viajya dre Dyved in Kembra Soth. Warlergh concêvya an flogh, yth yw leverys na wrug hy debry ma’s bara hag na wrug hy eva ma’s dowr erna veu va genys. Whedhel aral a lever fatell dheuth pregowthor brâs dhe brogeth dhyrygthy. Saw ev a gafas na ylly ev leverel ger vÿth in presens an flogh in hy brÿs. Y feu hedna convedhys dhe vênya y fedha hy mab pregowthor brâs. Ha heb mar, hèn o gwir, rag an flogh a veu sans tasek Kembra. Chyften i’n pow-na (Aergol Lawhir martesen) a dhescas fatell o Non gans flogh ha fatell esa hy mab ow qwil merclys hag ev whath in torr y vabm. Rag hedna ev a berthy own a’n mab bian rag ev dhe gresy an flogh dhe vos peryl brâs dhodho. Ytho an chyften o ervirys dhe ladha an flogh kettel ve genys. Saw y wharva hager-awel mar wyls nos an enesygeth, na ylly den vÿth dos in mes a’y jy. Y fedha leverys kefrÿs fatell o mar uthyk an painys golovas sùffrys gans Non, may whrug hy besias cravas an garrek dalhednys gensy in hy thorment; ha pelha may whrug an garrek falja in kescodhevyans gans an venyn druan. Y feu eglos byldys i’n tyller may feu Dewy genys ha’n men merkys dre hy besias yw radn a fùndacyon an alter. Non a vagas hy mab in Henfeynyw ogas dhe Aberaeron (inter Keredygyon hag Aberystwyth). Yth yw genesygla Dewy aswonys hedhyw avell Capel Non. Non a wrug growndya lenjy ogas lowr dhe’n tyller-na in plass gelwys Llannon. Dell hevel Non a viajyas dhe Gernow wosa hy dhe dhon Dewy. Yth yw eglos Alter Non in Kernow sacrys dhedhy. Yma eglosyow erel in Dewnan, in Keredygyon hag in Conteth Ker Verdhyn sacrys dhedhy. Yth yw Non mabsanses Pluw Nenyd (Pelynt) in Kernow kefrÿs; pelha yma fenten aswonys avell Fenten Nona i’n bluw-na. Dhyworth Kernow Non a brocêdyas dhe Dirinon (hèn yw Derow Non) in Finisterre in Breten Vian. Ena hy a fùndyas lenjy aral. Yth yw leverys fatell verwys hy in Dirinon an tressa dëdh a vis Merth. Dell hevel, y fedha creryow Non onourys in Alter Non in Kernow, saw y feu an creryow dystrôwys in dedhyow an Dasformyans. Yma Alter Non ryb Pluw Dewy ‘Davidstow’ neb yw sacrys dh’y mab. Yth yw eglos Alter Non an eglos vrâssa i’n côstys-na hag yth yw hy aswonys avell Peneglos Goon Brèn. Y feu an present byldyans derevys i’n pymthegves cansvledhen. Aswonys dâ yw an eglos, in mesk taclow erel, rag an kervyansow predn orth pednow an esedhow. Yma dyw a’n kervyansow-na ow tysqwedhes crowdor ha pibor gwyskys in losten. An lostednow a veu kemerys avell model rag golesen Kernow ‘the Cornish Kilt’ i’n nawnjegves cansvledhen.