(448) Stefan Sans - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In Pow an Sowson an jëdh wosa dëdh Nadelyk yw gelwys ‘Boxing Day.’ In Pow an Sowson i’n dedhyow coth whefes dëdh warn ugans Kevardhu o an jorna rag ry ha recêva royow Nadelyk pò in Sowsnek ‘Christmas boxes’ ha hèn yw styr an hanow. In Wordhen an whefes dëdh warn ugans a Gevardhu yw aswonys avell Lá Fhéile Stiofáin, Degol Stefan pò ‘St Stephen’s Day.’ Yth yw an degol-na complys i’n carol Sowsnek ‘Good King Wenceslas looked out on the Feast of Stephen.’ Whedhel Stefan yw derivys in Actys an Abesteleth; i’n seythes chaptra ny a red fatell veu Stefan drÿs dhyrag Consel an Yêdhowon, le may whrug ev afydhya y grejyans in Crist. An consel a sorras brâs ha Stefan a veu tednys in mes a’n cyta ha labedhys ‘stoned’. Stefan ytho a veu an kensa martyr Cristyon, ha nyns yw marthys ev dhe vos onorys in oll an bÿs Cristyon. Y hanow y kefys in Kernow, in Lann Stefan (Launceston) hag Eglos Stefan in Branel. Yth yw ev complys inwedh in re-ma: Faiche Stiabhna (Stephen’s Green) in Dulyn, Wordhen; St Etienne hèn yw Stefan Sans, cyta in soth-ÿst a Frynk; Santo Stefano in Venys, Italy, ha Convento de San Esteban (Broderjy Stefan Sans), in Salamanca, Spayn. Res yw remembra bytegyns fatell eus ken Stefan Sans, pò Szent Istvan i’n bÿs— sans tasek Ùngary. I’n degves cansvledhen yth esa an Ùngaryans owth ownekhe oll Ewrop Cres. Y feu nebes attentys gwrÿs dhe wil pobel Gristyon anodhans saw ny wrug an attentys spêdya re dhâ. Pàn veu Stefan gwrÿs mytern Ùngary warlergh y das Géza, ev a besys Pab Sylvester orth very dyweth an degves cansvleden may whrella ev besydhya Stefan avell kensa mytern Cristyon an Ùngaryans. Hedna a styryas fatell veu Ùngary gwlascor anserhak Cristyon ha na ylly an Emprour San Roman perhenegy Ùngary avell y bosessyon fewdal. Sylvester a dhanvonas cùrun dhe Stefan saw hy a veu nebes damajys wàr an fordh. Yth yw an grows cabm whath gwelys a-ugh côta arvow Ùngary. Stefan o mytern Ùngary dres dew ugans bledhen hag i’n termyn-na an vrâssa radn a’n bobel dhegemereas an grejyans Gristyon. Stefan a fùndyas eglosyow ha scolyow nowyth. Ev a wrug cres gans an Bùlgaryans rag yth esa Ùngaryans aga eskerens kyns ès y rain ev. Stefan a wrug cres inwedh gans Emprour Roman an Ÿst ha rag hedna pàn veu Ùngary assaultys gans an Jermans, luyow Stefan o crev lowr rag aga fetha ha’ga drîvya in mes an pow. Ny’n jeva Stefan ma’s udn mab Imre neb a veu ledhys gans bôra gwyls; yma certan re ow cresy bytegyns fatell yw errour hedna ha fatell veu Imre ledhys gans teylu neb o escarus dhe’n fedh Gristyon. Stefan a dhros ajy lahys growndys wàr dradycyons an Ùngaryans hag ytho, ny ylly Ùngary codha in dadn allos an eglos. Y feu basylyca a byldys in Bùdapest i’n secùnd hanter an nawnjegves cansvledhen. Porposys o an governans kyns oll dhe sacra an eglos dhe Leopold, sans tasek Austria, saw preferyans nacyonalyst a brevailyas hag y feu an eglos sacrys dhe Stefan, sans Ùngary.