(451) Efesùs - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth o Efesùs cyta a bris brâs i’n empîr Rôman. Yth esa hy wàr an cost a Âsya Vian (Tùrky hedhyw). Hy yw yw gelwys Seljùk lebmyn ha nyns yw hy re bell dhyworth Izmir. Herwyth an vythologieth Grêca Efesùs a veu fùndys gans Androchùs mab Codrùs i’n vledhen mil hag eth deg seyth dhyrag Crist. I’n bledhydnyow wosa dasserghyans Crist, yth esa kemeneth a Yêdhewon Gristyon in Efesùs, saw erna dheuth Sen Powl dhodhans, aga skians a’n grejyans o pòr lymytys. Ny wodhyens y ma’s adro dhe vesydhyans Jowan Baptyst ha ny wrussons clôwes bythqweth a’n Spyrys Sans. Herwyth an tradycyon Sen Powl a screfas y epystlys dhe’n Corynthyans in Efesùs. Pelha an Werhes Ker Maria a vêwas in Efesùs tro ha dyweth hy dedhyow i’n bÿs. In dedhyow an empîr Rôman Efesùs o an tyller moyha a bris rag an devôcyon dhe’n dhuwes Artemis (Diana in Latyn). Hy o duwes an bÿs naturek ha gordhys o hy avell gallos an dor ha’n vabm wergh a oll bêwnans. Hy a o dysqwedhys avell venyn, lies hy brodnow avàn, ha dyllas bedh adro dhedhy awoles. Pàn dheuth Sen Powl dhe Efesùs dhe brogeth dasserghyans Crist, ev a vetyas enebyans dhyworth den henwys Demetryùs ha’y sewysy. Demetryùs o gweythor arhans esa ow qwil scrînyow arhans rag onora Artemis. Yth esa ev ha’y gowetha ow perthy own y whre crejyans in Crist lehe an devôcyon dhe Artemis hag indelha shyndya aga negys yn frâs. Rag hedna y a settyas warbydn Sen Powl ha’n bobel Gristyon i’n cyta. I’n vledhen try hans ha tredhek an emprour Constantîn a dheclaryas an Gristoneth dhe vos crejyans stât an empîr Roman. Ny vedha an Gristonyon compressys na felha. Saw nyns o pùb tra sempel hag êsy rag an eglos Cristyon alena rag. Yth esa Nestoryùs patryark Constantynôpel ow progeth fatell ylly an Werhes Ker bos gelwys Christotokos ‘mabm Grist’ saw ny ylly hy bos gelwys Theotokos ‘mabm Dhuw;’ hy o mabm Grist an den dâ lowr, saw nyns o hy mabm Dhuw y honen. Res o decernya inter an dhew berson in Jesus Crist avell den ha Duw warbarth. Nyns o Cyryl patryark Alexandrya acordys gans Nestoryùs hag ev a besys an Emprour, an secùnd Theodôsyùs, dhe gùntell consel êcùmenyk rag determya an mater. Pàn o an epscobow devedhys warbarth ha warlergh whythra an mater yn town, y a agrias fatell o opynyon Cyryl an tybyans ewngryjyk; yth o res dhe’n Cristyon dâ avowa fatell wrug an Werhes Ker Maria don Crist avell den ha Duw warbarth. Ytho y feu dendylys gensy an tîtel ‘mabm Dhuw.’ An consel êcùmenyk neb a dheclaryas an Werhes Ker Maria dhe vos mabm Dhuw a dheuth warbarth in Efesùs. Martesen nyns o keswharvedhyans fatell veu Maria aswonys avell Theotokos ‘mabm Dhuw’ in Efesùs. Efesùs, dell welsyn ny, termyn alena o crêsen an dhevôcyon dhe Diana, myternes nev ha mabm wergh a bùb bêwnans. In Efesùs an Werhes Ker Maria a veu declarys dhe vos mabm Dhuw hag ytho myternes nev.