© 2024 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Me a gôwsas termyn alebma a nebes henwyn pagan in Godhalek. Rag ensampyl, Mac Dara ‘mab an dherowen’ ha Nath Í ‘mab wydn an ewen.’ Yma an dhew hanow-na growndys wàr henwyn rag gwedhen. Dell hevel nyns yw henwyn a’n sort-na kefys i’n tavosow Brethonek. In Kembrek yma henwyn personek Keltek gwrÿs a dhew element gorrys warbarth, rag ensampyl, Cynfelyn dhyworth *Cuno-belinos, le may ma *Cuno- ow mênya ‘ky’ ha Belinos yw growndys wàr hanow an duw Belinos, Belenos. Avell ensamplys erel ny a yll compla Llywarch dhyworth *Lugu-markos ‘margh an duw Lugus’ ha Caswallon dhyworth Cassivelaunos. Yma an form Cassiuelaunos destys in istory avarr an Vrethonyon. Y hyll Cassiuelaunos bos styrys avell ‘chyften an brons, chyften an sten’, hèn yw ‘chyften fyrm in batel.’ A les yw bos Caswallon kefys i’n form Kernowek Casvelyn in Bêwnans Meryasek. Warbarth gans an henwyn-na a dhevedhyans Keltek, yma lies hanow kefys in Kembrek ha (Kernowek traweythyow kefrÿs) neb a veu benthygys dhyworth Latyn pàn esa an Romans in Breten Veur. Kyns oll y feu benthygys dhyworth Latyn radn a henwyn an mîsyow hag a dhedhyow an seythen. Rag ensampyl an re-na ûsys in Kernowek wosa De, Duw; Merth dhyworth Latyn Martis (mardi in Frynkek), Merher dhyworth Latyn Mercurii (mercredi in Frynkek:), Yow dhyworth Latyn Iouis (Frynkek jeudi); Gwener dhyworth Latyn Veneris (vendredi in Frynkek), Sadorn dhyworth Latyn Saturni (gwelys inwedh heb mar in Sowsnek ‘Saturday’). Otta nebes a’n mîsyow benthygys dhyworth Latyn: Genver dhyworth Ianuarius, Whevrel dhyworth Februarius, Ebrel dhyworth Aprilis, Mê dhyworth Maius, hag Est dhyworth Augustus. Yma lies hanow personek in Kembrek hag in Kernowek a veu benthygys dhyworth Latyn inwedh. I’ga mesk ny a yll compla an re-ma: Emrys dhyworth Ambrosius, Meirion dhyworth Marianus (gwelys in Merioneth); Custennin in Kembrek, Costentyn in Kernowek dhyworth Constantinus; Kembrek Geraint, Kernowek Gerrans, dhyworth Gerontius; Macsen in Kembrek ha Massen in Kernowek (Bêwnans Meryasek) dhyworth Latyn Maximus; Tegid Kembrek dhyworth Tacitus; Yth yw hedna gelwys martesen in Mytern Alwar ha Pygys in Bêwnans Meryasek, le may hyll Pygys bos cabmredyans rag *Tygys. An hanow Sylvester yw kefys in Chysauster ha’n hanow Kernowek Ust dhyworth Latyn Iustus yw kefys in Re Yist ‘by St Just’ complys gans Lhuyd. Me a grÿs kefrÿs fatell usy an hanow tyller Tresidder ow tos dhyworth tre + Isydor. Coynt yw na veu medhelhës an d the dh, saw dre lycklod an r in Isydor dhyworth Latyn Isidorus a grefhas an d. Res yw dhybm leverel neppyth obma adro dhe formys a’n hanow ‘John’ in Kernowek. Dell welsyn ny, Latyn Iouis a ros Yow in Kernowek in de Yow. Latyn Iohannes ‘John’ a ros Ieuan in Kembrek. Ny a vynsa ytho gwetyas Yowan in Kernowek, hag in gwir Caradar a ûsyas *Yowan in y drailyans a Awayl Sen Mark. Yth hevel bytegyns na welyr *Yowan ma’s yn udnyk in Golowan ‘feast of St John, midsummer.’ I’n textow Kernowek an form yw Johann, Jowan pùpprÿs. Y feu hedna benthygys dhyworth Frynkek Cres gans j [dȝ] avell an kensa kesson. Rag hedna gwell yw ûsya *Jowan avell an form Kernowek rag ‘John.’