(461) Amser Ambosek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In gramer an tavas Kernowek yma amser gelwys an amser ambosek pò ‘conditional tense’. Rag ensampyl, ev a via ‘he would be’, me a wrussa ‘I should do’, ha ny a welsa ‘we should see’. Yth yw an amser ambosek ûsys in ambosow degës — i’n kemel, pò ‘clause’ nag usy an ger rag ‘if’ ino. Ot obma nebes examplys. Merkyowgh fatell yw a gans trailyans cales wàr y lergh an ger rag ‘if’ inhans: unweyth a caffen hawnsel, me a wrussa amendya (Bêwnans Meryasek); hedhyw a tryckes in tre, dhyragos te a’n gwelsa byw in poynt dâ (Resurrexio Domini); unn dra a wòn, a’n gothfes a wrussa dha dhydhana (Origo Mundi); arlùth, lemmyn a’s dysken dyragowgh, noth y fien (Resurrexio Domini); A tryckewgh bytte vledhen, grâss y whodhvien dhywgh why (Bêwnans Ke). Ot obma nebes lavarow mayth yw negedhek an verb ambosek: gallos warnaf ny’ fies, na ve y vos grauntys dhis dyworth uhella arlùth (Passio Christ); rag ny wodhons yn teffry poneyl a wrowns drog pò dâ, hag a cothfons eredy, ny wrussens ow dystrêwy (Passio Christi); rag ny welyn, hag a qwellen, my ny’n gwrussen (Passio Christi); a pe va den drog y nas, ny alsa in neb maner pòr wir cafos mar meur ras rag sawya tus dre unn ger (Passio Christi). Traweythyow ny a gav mar ‘if’ in ambosow degës in le a ‘if’. Yma Bersabe ow lamentya na yll hy cùsca gans Davyth mytern heb y geles dhyworth Ùrry hy gour; otta hy owth ûsya a ‘if’ ha mar ‘if’ warlergh y gela: Ow arlùth ker caradow, assa via plegadow genef gruthyl bodh dha vrÿs, a callen heb keladow ha dowt ow bos helerhys; mar cothfa an casadow, dystowgh y fien ledhys (Origo Mundi). Warbydn termyn Tregear, yth yw mar ûsys pùpprÿs in ambosow; Pelha yma Tregear ow tallath an kensa kemel gans mar teffa ‘were it to happen’: Mar teffa den vÿth ha pregoth dhe’n nacyons-ma in aga êth y aga honen, in by an by y a vynsa stoppya aga scovornow; ha mar teffa an holl bredereth obeya according dhe’n comondmentys a Dhuw, ny vynsa den vÿth styrrya na gwaya warbyn an collejys. In pùb lavar bys lebmyn yth esa an gis sojeta i’n kensa kemel. Yma Nicholas Boson bytegyns owth ûsya an ambosek i’n dhew gemel: Mar qwrussa an den deskys fur-na gweles hemma, ev a vynja cavos fraga y ôwna in skrifa-composter. In Sowsnek ny a lever ‘He said he would do it’ hag ytho yma Sowsnegoryon temptys dhe drailya hedna avell Ev a leverys *y whrussa ev y wil. Saw hèn yw cabm; y whre yw compes. In cows reportys res yw ûsya an amser anorfednys: me a’n clewas diogel lies gweyth ow leverel, an templa y whre terry (Passio Christi); ha’n amser êwn a bos yw bedhen: an el a bregewthy a’n wedhen hag a’y vertu: a’y frut a wrella dybry y fedha kepar ha Duw (Origo Mundi); danvon warlergh Syluester hag y fedhen heb awher a oll ow cleves sawys (Bêwnans Meryasek); Ev a bromyssyas fatell vedha onen genys mes a’n stock ha’n has a Êva (Tregear).