© 2024 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Herwyth y vroder yonca yth esa Robert Nance ow cresy fatell o dysacrans dry dowr ajy i’n chy dre bîbow. Gwell o kerhes dowr in bùckettys. Pàn esa Nance tregys in Nancledra idir Porth Ia ha Penn Zans, y feu an kensa peulyow telegrafek settys in bàn i’n côstys-na. Cas êns y dhe Nance hag ev a leverys y fia dâ ryddya an plâss anodhans der aga molethy in kerdh. Apert yw fatell o Nance escar dhe’n bÿs modern. Nance o genys in Soth a Gembra i’n vledhen êtek seyth deg try ha deskys veu ev avell artyst ha lymnor in Pow an Sowson. Ny gafas ev dyscans bythqweth i’n skians a davosow. Pelha ny dhalathas ev desky Kernowek bys i’n vledhen nawnjek ha whe, pàn o va moy ès dewdhek wàrn ugans bloodh. Nance a wrug dysplêgya an gramer ha’n spellyans a Gernowek Udnys in bledhydnyow ugans an cansvledhen dewetha. Henry Jenner o Bardh Meur dhyrag Nance ha pàn wrug Nance y sewya, drefen ev dhe breferrya an dra goth dhe’n dra nowyth, Nance a sconyas practys Jenner a whelas “kemeres an yêth Kernowek in bàn le may whrug hy cessya.” Insted a hedna ev a wre meras pùpprÿs orth an Osow Cres avell penfenten an tavas dasvêwys. Gwir yw leverel nag o an dôwys-na fur yn tien rag an dasserghyans Kernowek. Kyn whodhya Nance meur ow tùchya an Kernowek, ny ylly ev y gôwsel heb caletter. In gwir, ny vedha ev attês pàn wrella pobel côwsel Kernowek heb hockya in y bresens. Pelha, nyns o an Kernowek a wre va screfa kewar pùpprÿs. Nance a dhyllas lyver in dadn an tîtel Lyver an Pymp Marthus Seleven. Cabm yw an ger mell an ena: lowr via Lyver Pymp Marthus Seleven. Ym an keth errour gwrÿs ganso in y sacrans dhe gov Caradar in y erlyver a nawnjek pymp deg dew. Nance a scrif in tylleryow tewl an Yeth Kernow. Hèn yw myskemerys. Ewn via in tylleryow tewl Yeth Kernow. Dell hevel kefrÿs yth esa Nance ow cresy lavarow kepar ha me a vynn gweles dhe styrya pùpprÿs ‘I want to see, I desire to see’—tybyans nag yw gwir. Yma lavarow i’n textow gans tra dhyvew avell sojeta ha mynnes, na yll whans bos ùnderstondys inhans; rag ensampyl: rag an lahys dhyn ny eus a vynn y dhampnya porrês (Passyon agan Arlùth) ha mar mynn ow dyscans servya (Bêwnans Meryasek); pelha Lhuyd a lever me a vydn mos alês dhe styrya ‘I will walk forth’ kepar ha’n devedhek sempel in Sowsnek. Nyns usy Nance ow compla in tyller vÿth fatell yw trailys ‘I want to’ in Kernowek yn fenowgh gans carsen, carsa: Ot obma nebes examplys: y weles me a garsa ha cows orth ow mab Jesu (Resurrexio Domini); prownter bos me a garsa (Bêwnans Meryasek); mones genowgh y carsen (Bêwnans Meryasek); Me a garsa dhodho dysqwedhes unweyth pyw ov (Bêwnans Ke) ha Me a garsa yn tefry cafos gorthyp yn certan (Bêwnans Ke). I’n dedhyow usy ow tos me a wra côwsel moy ow tùchya gerva an tavas tradycyonal ha tybyansow coynt Nance i’n mater.