© 2024 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In lyver Jùjys pàn esa Debora ow rêwlya Israel, hy ha Barak a jùnyas warbarth dhe overcùmya Jabyn mytern Hazor. Chyften lu Jabyn o Sysera ha warlergh kelly an vatel gans Barak ev o sqwith dres ehen. Sysera a scappyas ha whelas sentry in tent Jael, gwre’ty Heber, Kenîta. An Kenîtas o kefrysys gans Jabyn mytern Hazor i’n termym-na. Jael a’n wolcùbmas, hag a ros dewas leth dhodho. Ena hy a gùssulyas dhodho growedha in hy thent ha hy a’n cudhas yn cles. Pàn esa ev ow cùsca, hy a gerhas morthol hag ebyl tylda pò ‘tent peg’. Ena hy a herdhyas an ebyl aberth in y eryow pò ‘temples’ hag ev a verwys. Indelha y feu collenwys profecy Debora y whre benyn delyfrya Mebyon Israel dhyworth Jabyn mytern Hazor. An wharvedhyans-na a hapnyas in Valy Esdaelon, aswonys kefrÿs avell Valy Megiddô. Lies bledhen wosa hedna y feu Josias, mytern Israel, ledhys i’n keth tyller. Yma an secùnd lyver a’n Vyterneth ow terivas an whedhel a Josias indelma: In dedhyow Josias Farô Necô, mytern Ejyp, êth in bàn dhe vytern Assyrya bys in dowr Ewfrâtes. Mytern Josias êth dhe vetya ganso, ha Farô Necô a’n ladhas in Megiddô, kettel wrug ev y weles. Mernans Josias a veu strocas uthyk rag Mebyon Israel, rag Josias o an moyha gwyrion a oll aga myterneth. Yth hevel ytho na ylly an Yêdhewon ankevy fatell verwys Josias awos oll y ewnhenseth hag in Megiddô. In lien an Yêdhewon warlergh hedna y feu Megiddô complys yn fenowgh avell an tyller rag an vatel dhewetha inter Duw ha myterneth an bÿs, leun aga fegh. Kynth yw elementys a’n lien apocalyptek a’n sort-na dhe weles in nebes tyleryow i’n Testament Coth, ny veu dysplêgys lien apocalyptek Ebrow yn tien bys i’n dedhyow wosa an exîlyans in Babylon. Porpos an lien-na o dhe gesseny sùffrans an Ebrowyon gans jùstys hag ewnhenseth aga Duw. Heb mar, lien apocalyptek a veu contynewys gans an Gristonyon; ha hèn yw apert in lyver dewetha an Testament Nowyth, Dysqwedhyans pò Revelacyon. I’n whêtegves chaptra yma el Duw ow cùntell an drogspyryjyon ha myterneth an bÿs warbarth dhe’n tyller gelwys Armageddon rag batel dëdh brâs Duw Ollgalosek. An jëdh-na y fÿdh dyweth an bÿs; myterneth an bÿs a vÿdh overcùmys ha rain Duw a wra dallath. An hanow Armageddon ena yw dhe vos ùnderstondys avell versyon Grêca a’n Ebrow Har Megiddô pò ‘Meneth Megiddô’. Nyns eus meneth vÿth in Megiddô, rag plain ywa. Yma scoloryon ow styrya an Har, Ar ena avell ‘Tell’ pò ‘Crug a vrewyon.’ Dre rêson a’n tyller-na in Lyver Revelacyon, y feu Armageddon kelmys yn stroth gans dyweth an bÿs. Rag hedna in dedhyow an Gwerryans Yêyn inter an West ha’n Udnyans Sovyetek, pobel a wre côwsel a werryans sprusek avell Armageddon. Moy adhewedhes bytegyns yma an hanow Armageddon ow corra in brÿs an bobel an fylm a nawnjek naw deg pymp. In hedna yma men cowas pò ‘meteorite’ ow codros dhe weskel an bÿs ha ladha mylyons. Saw yma Bruce Willis ha’y gowetha ow spêdya dhe dhystrowy an men cowas dre danbellen sprusek. Indella selwys yw pùbonen.