© 2024 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Santiago de Compostela yw an vrâssa cyta in provyns Galycya i’n North-West a Spayn. Yma Santiago ow mênya Sen Jamys; nyns yw apert pÿth yw styr Compostela. Herwyth Actys an Abosteleth Sen Jamys o broder Jowan ha mab Zebedê. Warlergh whedhel derivys i’n Osow Cres Sen Jamys a wrug progeth an awayl in Spayn hag ena dewheles dhe’n Pow Sans. I’n tyller-na ev a veu dybednys orth arhadow Herod Agrypa i’n vledhen dewgans ha peswar. Wosa y vernans y sewysy a dhros y gorf dhe Spayn hag a diras orth cost Galycya. Ena y a dhug y gorf dhe forest Lybredon ha’y encledhyas. Ankevys veu tyller y encledhyans. Eth cans bledhen moy adhewedhes steren spladn a wrug gedya den gelwys Pelayo Hermyt dhe dyller bedh Sen Jamys. Pelayo a dherivas dhe’n epscop fatell o dyscudhys ganso eskern an abostol. An epscop a dheclaryas an eskern-na dhe vos eskern Sen Jamys in gwiryoneth. An epscop a dhanvonas ger dhe’n Mytern. Rag onora Sen Jamys y feu peneglos byldys wàr dyller y vedh ha hedna a veu gelwys Santiago ‘Sen Jamys’. Byldyans an beneglos a ledyas dhe dysplêgyans Santiago avell cadarnla Cristyon in north a Spayn —pàn esa an Gristonyon ow whelas drîvya an Sarsyns in mes a’n wor-enys. Nebes ha nebes Santiago a devys dhe vos pedn fordh onen a deyr frierynsy brâssa an Gristoneth. An dhyw erel yw Jerùsalem ha Rom. Yth yw crogen an prieryn pò ‘scallop shell’ symbol an brierynsy. Tavas gwredhek Galycya yw Galycyan ha hedna wostallath o an keth tavas avell Portyngalek. Yma crejyans crev in mesk an Galycyans aga honen y dhe vos dyhaval dhyworth poblow erel Spayn. In gwir yma re in mesk kenedhlegoryon Galycya ow plêntya Galycya dhe vos pow Keltek hag y aga honen dhe vos Keltyon. Saw nyns eus rêson academek vÿth dhe scodhya opynyon a’n sort-na. Yma an ger Keltyon ow referrya yn udnyk dhe bobel usy ow côwsel tavas Keltek, an Gembrion rag ensampyl, pò pobel esa ow côwsel tavas Keltek termyn cot alebma, rag ensampyl an Gernowyon. Kynth eus covebow Keltek in Galycya ha kynth yw pîbow sagh daffar mûsyk Galycya, Galycyan pò Galego yw tavas Romans neb a dhysplêgyas dhyworth Latyn. Nyns yw text vÿth dhe gafos in tavas Keltek dhyworth Galycya. Mars yw Galycyan tavas Keltek, ena Portyngalek yw tavas Keltek kefrÿs ha nyns usy den vÿth ow pretendya hedna. I’n gettesten-ma res yw compla neppÿth aral ow tùchya an tavosow Keltek in Ibêrya. Yma tavas destys in covscrîvyow dhyworth an soth-west a Spayn ha’n soth a Portyngal. Dell hevel y feu an radn vrâssa an covscrîvyow-na kervys i’n seythves cansvledhen dhyrag Crist. Tavas an covscrîvyow yw aswonys avell Tartessyan. Kyn nag usy pùbonen owth acordya ganso, an yêthor John Koch re dhysqwedhas fatell yw Keltek Tartessyan hag ytho fatell wrug an Keltek dallath in gor-enys Ibêrya, ha lêsa alena dhe’n north dhe Vreten, dhe Wordhen ha dhe bowyow erel Ewrop. Nyns yw Galycyan tavas Keltek, saw mars yw prederow Koch compes, dell esoma ow cresy ow honen, an tavosow Keltek a dhalathas in Ibêrya.