© 2024 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma an ger eneseth ow referrya dhe stât ajy yn tien dhe stât aral. Rag ensampyl Lesotho yw eneseth, rag yma hy ajy yn tien dhe Soth-Afryca. Wàr an tenewen aral nyns yw Eswatini (Swazilond) ma’s hanter-eneseth, rag yma Soth-Afryca dhe’n soth dhedhy saw yma Môzambîk dhe’n north. In Ewrop yth yw Cyta an Vatycan eneseth, drefen hy dhe vos yn tien ajy dhe Italy. Yma poblegeth San Marînô ajy yn tien dhe Italy kefrÿs. Yth yw Monacô yn part ajy dhe Frynk, saw nyns yw an bensevygeth gwir-eneseth drefen hy bos wàr gost an Cresvor. Yma pensevygeth Andorra in Menedhyow Pyrynês inter Frynk ha Spayn. Arta nyns yw hy gwir-eneseth, rag yma moy ès udn pow adro dhedhy. Kynth yw Andorra gelwys pensevygeth, ny’s teves hy pensevyk a’y honen. Yma dew bedn stât dhedhy: Epscop Urguell in Spayn ha Presydent Frynk. Yma dyw hanter-eneseth ow longya dhe Spayn wàr gost Marocô gelwys Ceuta ha Melilla. Y fÿdh governans Marocô ow pesy Spayn pùpprÿs dhe hepcor an dhyw cyta-na may hallens y bos jùnys arta dhe Marocô. Gorthyp an Spanyers yw Ceuta ha Melilla dhe vos radn istorek a wlascor Spayn. Nyns yw an rêsnans-na re fur rag an Spanyers bytegyns. Mars yw Ceuta ha Melilla cytas istorek Spaynek, ena governans an Wlascor Udnys a’s teves an gwir dhe glêmya Jybraltar dhe longya yn istorek dhe’n Vreten Veur. Coyntys geografek aral yw balak pò ‘salient’; yma hedna ow styrya skethen a dir owth istydna dhyworth udn pow aberth in pow aral. Ensampyl dâ yw Balak Caprivi, radn a Namybya usy owth istydna dhyworth Namybya bys in Dowr Zambêzy. Yth ywa gelwys Balak Caprivi, rag y feu hy rÿs gans an Sowson dhe’n wlasva Jerman a Sudwest Afrika/Namybya i’n vledhen êtek naw deg in mes a North-Rôdêsya/Zambya ha Bechwanalond/Botswana pàn o Georg von Caprivi an chansler Jerman. Porpos an balak o dhe ry dhe’n Jermans in Sudwest Afrika mesfordh pò ‘outlet’ bys in Dowr Zambêzy’ hag indelha hens wàr an ryver bys i’n cost ÿst a Afrika. I’n gwetha prÿs ny ylly gorholyon mos oll an fordh dhyworth Balak Caprivi dhe’n mor dre rêson Dowrlabmow Vyctorya dhe vos lestans dydremen dhyragthans. Saw gesowgh ny dhe dhewheles dhe’n negys a enesedhow. Dre lycklod yth yw an eneseth moyha dhe nôtya in oll Ewrop an dreveglos Veljan gelwys Baarle-Hertog. Yma meur a’n dreveglos-na in Beljùm saw yma parcels bian erel anedhy kefys ajy dhe gemeneth Baarle-Nassau in Powyow Isel. Y hyll an enesedhow Beljan bos styrys der ambosow dyvers gwrÿs i’n Osow Cres inter Arlydhy Brêda ha Dûkys Brabant. Yth yw radn a’n parcels Beljan mar vrâs may ma radnow Iselalman aberth inhans. In kensa gwerryans an bÿs y whrug an parcels Beljan gwythresa avell sentry rag cytesans Beljan, rag nyns esa an Iseldiryow ow kemeres part i’n omlath ha ny ylly an Jermans tremena tiryow Iselalman. In agan dedhyow-ny yma Beljùm ha’n Iselalmayn i’n Udnyans Ewropean, ymowns y owth ûsya an keth mona hag ow longya dhe Wrugys Schengen. Indelha nyns eus meur a broblemow hedhyw inter an dhyw gemeneth.