© 2024 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma an hanow Nycolas kefys unweyth i’n Beybel —in Actys chaptra Whe, rag Nycolas o onen a’n seyth diagon dôwysys rag radna boos yn ewn in mesk an Gristonyon in Jerùsâlem. An Beybel a lever fatell êns y an re-ma: Stefan, den cryjyk ha leun a’n Spyrys Sans, Felyp, Procorùs, Nicanor, Tîmon, Parmenas, ha Nycolas, proselîta dhia Antiokia. Hanow Grêca yw Nycolas dhyworth nîko- ‘conqwerrya, vyctory’ ha -laos ‘pobel, lu, army’. Yth hevel ytho fatell usy an hanow ow styrya ‘conqwerrour pobel, conqwerrour army’. Heb mar y feu an hanow rÿs dhe sans brâs Sen Nyclas a Myra in Âsya Vian (Demre in Tùrky hedhyw). Nycolas yw sans tasek an flehes, drefen ev dhe ry mona in dadn gel dhe das bohosek teyr myrgh rag aga selwel dhyworth bêwnans avell hôrys. Degol Nycolas yw an whefes dëdh a vis Kevardhu hag in lies pow an jëdh-na a vedha solemnpys avell dëdh rag an flehes dhe recêva royow. An Iselalmans a elwy an sans Sinterklaas hag y a dhros an hanow gansans dhe Amsterdam Nowyth. Pàn veu an wlasva-na conqwerrys gans an Sowson ha das’henwys Evrok Nowyth, Sinterklaas a veu Santa Claus. Kebmyn o an hanow Nycolas der an Osow. In mesk an dus brâs aga hanow neb o gelwys Nycolas, ny a yll compla an astronomer Polek Nycolas Copernicus (peswardhegves/pymthegves cansvledhen) ha’n fylosofer Italyan Nycolas Machiavelli (peswardhegves/pymthegves cansvledhen). In y Survey of Cornwall a pymthek naw deg peswar Richard Carew a lever fatell yw an hanow Nycolas leverys Nyclaaz gans Kernowegoryon. Yth yw Bagas gelwys Nycolaytans campollys i’n Revelacyon i’n Testament Nowyth. I’n secùnd chaptra an auctour a lever dhe’n eglos in Efesùs: Saw hebma a yll bos leverys i’th favour: cas dhis yw oberow an Nycolaytans. Casadow yns y dhybmo vy kefrës. Saw dhe eglos Pergamùm ev a lever: …me a’m beus nebes taclow wàr dha bydn. Yma genes i’n tyller-na tus usy ow sensy a dhyscans Balaam. Y a dheskys Balak dhe settya antylly dhyrag pobel Israel. Y a’s inias dhe dhebry kig offrydnys dhe idolys, ha dhe wul fornycacyon. In kepar maner, yma radn genes usy ow sensy a dhyscans an Nycolaytans. Gwra repentya ytho. Mar ny wrêta codha in edrek, me a vydn dos dhis yn scon, ha gwerrya wàr aga fydn gans cledha ow ganow. Yth hevel ytho fatell yw an Nycolaytans eretykys in mesk an Gristonyon avarr. Pelha yth êns y sewysy a nebonen gelwys Nycolas. Nyns eus dùstuny vÿth an Nycolas-na dhe vos an keth den avell Nycolas complys in chaptra whe a’n Actys. Dell hevel yth esa an Nycolaytans ow tebry kig offrys dhe idolys hag owth inia Cristonyon dhe wil fornycacyon. I’n Beybel yma ‘fornycacyon’ yn fenowgh ow styrya dyslelder dhe’n Duw gwiryon. In lyver Nùmbers Balaam o pystrior brâs hag ev a veu brîbys gans Balak, mytern Môab, dhe volethy an Israelîtas, saw ev a veu lettys der y asen y honen. Yma Baalam in Ebrow ow styrya ‘Mêster a bobel, rêwlyor lu’; dyscans Balaam ytho yw dyscans Nycolas, eresy an Nycolaytans.