© 2024 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yth o Kentigern cadnas eglos pò ‘missionary’ gwlascor Vretednek in Stras Clud pò ‘Strathclyde’. Nyns yw certan pandr’yw tardhans y hanow ev saw dre lycklod yma va ow tos dhyworth Ken < Keun ‘dog’ ha *tigerno- ‘arlùth’. Yth ywa aswonys kefrÿs avell Mùngo. Yma hedna ow tos dhyworth an rag-gorrans onorek Godhalek mo, an hanow gwadn Godhalek finn ‘gwydn’ ha cû ‘ky, hound’ > mo-fhinn-gû > Mùngo. Kentigern a veu genys i’n vledhen pymp cans êtek in Cuileann Ros (Culros), Fìobha (Fife), Scotlond. Mabm Mùngô o Tenew, pensevyges ha myrgh Lewdonùs, mytern Lothian in Scotlond. Hy a veu defolys gans Owain mab Uryen. Herwyth versyon aral Tenew hag Owain a wrug avoutry warbarth hag ev whath demedhys dhe Penarwen, y wret’ty. Ena hy thas a wrug kescar an par, saw wosa Penarwen dhe verwel, Tenew a dhemedhas Owain kyns ès ev dhe vos ledhys in batel gans an Sowson. Kentigern a veu megys gans Serf Sans, mab lien esa esa ow menystra dhe’n Pyctyon in Fìobha. Pàn o va pymp warn ugans bloodh Kentigern êth tro ha’n west bys in Glaschù. Ena ev a fùndyas y eglos hag yma eglos Kentigern, hòn yw peneglos Glaschù ow sevel i’n tyller-na whath hedhyw. Yth esa môvyans crev gorth-Cristyon i’n tireth-na wàr ladnow Dowr Clud in dadn mytern gelwys Morken. Kentigern a veu constrînys dhe asa an pow ha fia dre Cùmbria bys in Kembra. Ena ev a fùndyas eglos in Llanelwy (‘St Asaph’ in Sowsnek). Mytern nowyth Glaschù, henwys Rhydderch a’n gelwys dhe dheweheles dhe Stras Clud. Kentigern a asas Asaf Sans avell epscop Llanelwy ha dewheles dhe Glaschû. Wàr gôta arvow Cyta Glaschû yth yw gwelys peswar tra kelmys gans Sen Kentigern: clog, collwedhen, edhen bian ha pysk eus besow in y anow. Dell hevel, pàn o Kentigern tregys in Glaschû, ev êth wàr brierynsy dhe Rom ha’n Pab a ros clog dhodho. Y fedha an clog-na gweskys rag oferen, saw y feu va kellys neb termyn ha clog nowyth a veu gwrÿs i’n seytegves cansvledhen. Pàn o Kentigern dyssypyl in dadn Serf Sans, y gowetha a ladhas rudhak pò ‘robin redbreast’ o meurgerys gans an sans. Dre y bejadow dywysyk Kentigern a spêdyas dhe dhasvêwa an edhen. I’n dedhyow-na kefrÿs y feu tan bew gesys in dadn with Kentigern, saw ev a godhas in cùsk ha’n tan a dhyfudhas. Pàn dhyfunas Kentigern, ev a gemeras branch dhywar collwedhen ha dasanowy an tan. Y wharva fatell esa Rhydderch mytern ow towtya lelder y wreg dhodho. An mytern ytho in dadn gel a gemeras dhyworty an besow a ros ev kyns ena dhedhy ha’y dôwlel in Dowr Clud. Nessa ev a erhys dhedhy ry wàr dhelergh dhodho an besow a gafas hy dhyworto. Yth esa an vyternes in fienasow brâs. Kynth o hy inocent, mar ny wre hy dysqwedhes an besow dh’y gour, hy a via gorrys dhe’n mernans, An vyternes a besys Kentigern dhe wil gweres dhedhy. Kentigern a gomondyas y servont may whrella cachya pysk i’n ryver. Pàn veu kechys an pysk, y feu an besow kefys in y dorr. Indelha hanow dâ ha bêwnans an vyternes a veu selwys.