(478) Harry Ferguson - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Henry George Ferguson, aswonys dell o ûsys avell Harry Ferguson, a veu genys in Conteth Down in North a Wordhen i’n vledhen êtek eth deg peswar. Y das o tiak. Pàn o va êtek bloodh ev êth dhe wonys gans y vroder coth, Joe, in y negys in Belfast ow qwertha dywrosow hag owth amendya kerry tan. Pàn esa ev ow lavurya avell jynor gans y vroder, ev a dhysplêgyas les down in airednans pò ‘aviation.’ Harry a wre vysytya dysqwedhyansow neyja in powyow tramor hag a wrug perswâdya y vroder y talvia dhodhans gwil airen in aga gweythva. Y a spêdyas dhe vyldya airen udn askell ha wàr an dyweth an airen a neyjyas in Hillsborough, in North a Wordhen dëdh dewetha an vledhen nawnjek naw. Indelha y feu Harry Ferguson an kensa den dhe neyja in Wordhen ha’n kensa den dhe vyldya y airen y honen in Wordhen kefrÿs. Harry a strîvyas gans y vroder ow tùchya sawder ha termyn devedhek airednow. Ev a erviras ytho fùndya y negys y honen, esa ow qwertha kerry tan ha jynys tedna. Awos y experyens gans jynys tedna, ev a welas an problemow ow pertainya dhe jyn tedna hag aradar kelmys warbarth avell dew dra dyblans. I’n vledhen nawnjek seytek Ferguson a vetyas Charles Sorensen hag y a dhebâtyas an possybylta a gelmy aradar ha jyn tedna avell unsys. Kyns ès hedna y fedha an aradar kelmys gans an jyn tedna kepar dell vedha an aradar kelmys gans margh. Saw hedna a wre causya meur a broblemow. Drefen an jyn tedna dhe vos creffa hag uskys’ha ès margh, an aradar tednys gans jyn tedna, a vedha troyllys adro gans an jyn, tra a wre lehe yn frâs effethuster an jyn. In mes a’n debâtyansow inter Ferguson ha Sorensen, y feu dysplêgys an kevrednans try foynt pò ‘three point linkage’. Awos an desmyk-na an ober a aras a veu gwrÿs liesgweyth gwell. Ferguson ow kesobery gans tus dyffrans a wrug versyons dyvers a’y jynys tedna a ylly bos jùnys gans erder ha lies injyn amêthek erel. Ev a wre amendya y dhesînys dhyworth an bledhydnyow deg warn ugans bys pedn ugans bledhen. Warbydn an bledhydnyow hanter-cans cowethas jynys tedna Harry Ferguson a veu onen an cowethasow moyha a bris i’n bÿs. Cowethas Ferguson a dhysplêgyas kefrÿs system rag drîvya kerry gans peder roos. Yth o an dysplêgyans-na a les in darbary kerry kestrif pò ‘racing cars’ gwrÿs gans cowethas Ferguson. Res yw avowa bytegyns na wrug an kerry kestrif-na spêdya re dhâ. Harry Ferguson a wrug kebmys avell jynor hag avell den negys, mayth yw a remembrys whath in meur a fordhow. Rag ensampyl in agan dedhyow ny yth yw pyctour Harry Ferguson gwelys wàr vanknôtys dyllys kyns gans an Arhanty North ha lebmyn gans Danske Bank in Wordhen North. Harry Ferguson a verwys i’n vledhen nawnjek try ugans in y jy in Conteth Gloucester, Pow an Sowson, hag ev pympthek ha try ugans bloodh. Chêson y vernans a veu gordhogen pò ‘overdose’ a varbytùrâtow. Ny ylly an whythrans wosa mernans determya a wharva hedna dre dowl pô dre wall.