© 2024 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Odovâker o soudour barbaryan dhyworth an tireth in cres Dowr Danûb, hèn yw dhe styrya provyncys Noricum (Austrya hedhyw) ha Pannonia (Ùngary hedhyw). Ev a veu genys adro dhe vledhen agan Arlùth peswar cans try deg try. Nyns yw certan pana drib esa ev ow longya dhodho. Yth hevel dhyworth y hanow, ev dhe vos esel a neb pobel Jermanek. Y feu va gelwys Goth gans certan re in y dhedhyow y honen, saw nyns yw hedna lyckly. Dre lycklod yth esa ev ow longya dhe’n Herùli. An Herùli o part a’y lu y honen hag ytho gwirhaval via ev dhe vos onen a’ga nùmber. Ev o Cristyon a’n eresy Aryan. Odovâker o adro dhe dheg bledhen warn ugans bloodh pàn forsâkyas ev y bow genesyk hag entra in servys an Empîr Roman. I’n vledhen peswar cans seyth deg whe ev a worras dhywar y dron emprour Roman a’n west Romùlùs Augùstùlùs. Nyns o Romùlùs ma’s maw udnek bloodh neb a sewyas y das Orestes avell emprour. Dre rêson na’n jeva Romùlùs er vÿth, ev yw consydrys an dewetha emprour i’n west. Odovâker a veu declarys mytern pò dûk Italy, roweth a sensas ev gans cubmyas seneth Rom. Odovâker bytegyns a gonsydras y honen dhe vos sojeta dhe Zênô an emprour i’n Ÿst. Odovâker a remainyas mytern Italy bys i’n vledhen peswar cans naw deg try pàn veu va ledhys in Ravena gans Theoderyk, Ostrogoth, dre falsury. Yma an hanow Odovâker ow tos dhyworth an ragform Ÿst-Jermanek *Audawakraz, hanow in dyw radn. An kensa element yw *auda- ‘rycheth, tresour’ ha’n secùnd yw wakraz ‘warden, gwethyas.’ Yma certan scoloryon ow styrya an hanow avell ‘den usy ow kemeres gwith a dresour’. Yth hevel dhybm na yll an styryans-na bos gwir. Mars usy den ow kemeres gwith a vona, nena ev yw crefny; rag hedna nyns ywa gorouryl pò ‘heroic.’ Moy gwirhaval yw an hanow Odovâker dhe styrya ‘dragon,’ rag i’n tradycyon Jermanek an dhragon yw an best par excellence usy ow qwardya tresour. Mars yw y hanow ow styrya ‘dragon’, ena apert yw an den dhe vos consydrys gwerrour fers. Res yw compla obma fatell yw Eadwacer hanow nebonen in bardhonek fest dyscler in Sowsnek Coth. Dre lycklod ytho yma gwredhyow an hanow Odovâker/Eadwacer part a vythologieth an poblow Jermanek. I’n whedhel Nordek, rag ensampyl, yma Sigurð ow ladha an dhragon Fafni, gwethyas tresour, hag indelha ow sêsya y owr. In secùnd radn a’n bardhonek Beowulf an gorour yw cothwas, hag otta va owth omlath gans dragon uthyk usy ow qwardya tresour. Beowulf a’s ladh saw an dhragon gans hy brath venymys a ladh Beowulf y honen. Yma an tybyans a dhragon ow qwardya owr kefys in mythologieth Grêca ynwedh. Rag ensampyl onen a oberow Hercùlês yw dhe gafos avallow an Hesperydês. An re-na yw avallow teg a owr gwrÿs avell ro demedhyans rag Hêra ha Zews. Gwardys yw an avellow pell dhe’n West gans dragon uthek cans pedn. Pelha in prydydhieth Gembrek yth yw an ger Kembrek draig ‘dragon’ ûsys yn fenowgh avell epythet rag chyften breselek. Gwirhaval yw ytho an hanow Odovâker dhe styrya ‘dragon’.