(484) Louis Feutren - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Louis Feutren a veu genys in Breten Vian i’n vledhen nawnjek dew warn ugans. Dhyworth y yowynkneth ev o kenedhlegor Bretonek. Pàn gonqwerryas an Jermans an Frynk i’n vledhen nawnjek dewgans, Feutren a jùnyas bagas breselek a scodhyas an Natsys in Breten Vian. I’n vledhen nawnjek dewgans ha try an bagas breselek-na a veu henwys Bezon Perrot ‘Unsys Perrot’, warlergh an Prownter Roman-Catholyk Jean-Marie Perrot, ledhys gans Comûnystyon in mis Kevardhu nawnjek dewgans ha try. Bezon Perrot a wrug kesobery gans an Waffen SS hag a veu consydrys gans an Natsys dhe vos radn a’n SS hy honen. Feutren a dhrehedhas an renk a Oberscharführer ‘ugh-bagaslêdyor’ hag ev a vedha gwyskys in unform a’n SS. Feutren ha’y gowetha a wre gwardya rag an Natsys cresen whythrans in Rennes. Wosa secùnd gwerryans an bÿs Feutren hag oll esely y unsys a veu dampnys dhe’n mernans rag drog-oberow warbydn Yêdhowon ha warbydn esely a’n Résistance. Feutren a scappyas ha dos kyns oll dhe Gembra ha warlergh hedna dhe Wordhen. Nyns esa ambos extradians inter Frynk ha Wordhen; rag hedna Feutren o salow in Wordhen. Pàn esa Feutren i’n pow-ma ev a wainyas gradh mêstrynsy ha gwarek in adhyscans in Coljy Ûnyversyta Galway. I’n vledhen nawnjek whe ha hantercans ev a dhemedhas Godhales henwys Maura Martin; i’n nessa bledhen ev a veu arvedhys avell descador Frynkek in ColjySen Conleth, scol bryveth secùnd level in Ballsbridge, Dulyn. Ev a remainyas i’n soodh-na erna wrug ev omdedna i’n vledhen nawnjek peswar ugans ha pymp. Feutren a verwys i’n vledhen dyw vil ha naw. In y lyther kebmyn Feutren a asas adro dhe dry hans mil buns sterlyn dhe Lyverjy Kenedhlek Kembra. Radn a’n sùmen-na a veu intendys dhe dhysqwedhes pana dhystrowus yw gwerryans ha fashystieth. An lyverjy a veu dampnys yn poos rag degemeres an mona. Adro dhe hanter-cans mil ewrô a veu gesys ganso dhe Ûnyversyta a Vreten Vian a’n West. Saw nyns o an ûnyversyta contentys dhe recêva an mona. Uki Goñi yw Arjentîn ha mab lÿscadnas pò ‘diplomat.’ Ev a veu genys i’n Stâtys Udnys saw yth esa ev tregys in Wordhen in bledhydnyow tryugans ha deg a’n cansvledhen dewetha. Ev a gafas y adhyscans secùnd level in Coljy Sen Conleth in Dulyn ha Feutren a dhescas Frynkek dhodho. I’n vledhen dyw vil dew warn ugans Goñi a dhyllas lyver The Real Odessa ow terivas in pana vaner a wrug lies trespassor gwerryans goheles pùnyshment wosa secùnd gwerryans an bÿs ha diank dhe Arjentîna. Nyns o Feutren Natsy crev yn udnyk. Warlergh Goñi, Feutren avell scolvêster o uthyk barbarus dh’y dhyskyblyon. Ev a wre shâmya an vebyon ha’ga cronkya yn harow. I’n cansvledhen-ma Goñi a lêdyas caskergh dhe gonstrîna Coljy Sen Conleth dhe dhyharas rag dew dra: an scol dhe alowa Natsy avowys dhe dhesky i’n scol; ha pelha Feutren dhe dhyghtya y scoloryon mar anwhek. Ny wrug an scol dyllo omascûsyans bys i’n vledhen dyw vil ha try warn ugans, may lavarsons y dhe berthy edrega adro dhe’n cùhudhansow. Herwyth Goñi nyns o hedna ma’s hanter-dyharas ha nyns o lowr poynt.