(488) Fentydnyow Sawya Cleves Brÿs

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

I’n dedhyow coth mars o nebonen muscok, y fedha leverys ev dhe vos sagh dyowl, hèn yw dhe styrya, ev dhe vos perhednys gans dyowl pò dewolow. Rag hedna an sawment compes o dhe sedhy an den varys in dowr a fenten sans, rag gallos benegys an fenten o lowr dhe dôwlel in mes an drogspyrys. William Borlase rag ensampyl, in y lyver The Natural History of Cornwall, a lever ow tùchya Alter Non: ‘Yth o an practys ena settya an den clâv y vrÿs wàr amal poll pedrak leun a dhowr dhyworth fenten Non Sans. Ny wodhya an den clâv tra vÿth a’n mater intendys, saw ev a vedha dre vobm sodyn wàr y vrèst herdhys i’n dowr, hag ena shakys in bàn ha dhe’n dor gans nebes tus galosek, erna ve va mar sqwîthys may whrella y gonar y forsâkya; i’n eur-na ev a vedha degys aberth i’n eglos hag y fedha oferen leverys ragtho; mar ny vedha ev yaghhës dystowgh, ev a vedha sedhys arta. Dre lycklod y fedha an sawment-ma practycys in ken tyleryow in Kernow’. Dell hevel yth o dowr fenten Meryasek in Cambron remedy rag cleves brÿs inwedh. Dell lever Meryasek y honen in Bêwnans Meryasek ow tuchya an eglos fùndys ganso: Grevons ha cleves seson mar a’n jevyth lel Cristyon ha’w remembra i’n plâss-ma, Jesu Arlùth cuv colon y grefons gwra sewajya. Inweth an dowr ow fenten rag den varys yn certan pesaf may fo ev ely, y dhry arta dh’y skians; Jesu Arlùth a selwans, graunt helma der dha vercy. I’n nawnjegves cansvledhen practys kebmyn o whath rag pobel dhe omwolhy aga honen in fenten Meryasek rag sawya clevejow brÿs. An re-na in Sowsnek o gelwys, Merrasicks, Merrasickers pò Merajacks. Yth yw leverys fatell eus sawment rag muscogneth in tobar Sent Cler in Ÿst a Gernow kefrÿs. Heb mar nyns yw fentydnyow sans avell remedy rag muscogneth lymytys dhe Gernow. In Wordhen ogas lowr dhe Dingle in west a gonteth Kerry yma fenten gelwys Tobar na nGealt pò ‘Fenten an Vuscogyon.’ Yma tradycyon coth in Wordhen adro dhe Suibhne mac Colmáin mytern Dál nAraidhe in provyns Ùleth i’n seythves cansvledhen. Herwyth an whedhel Suibhne a dhespîtyas Rónán Sans. Suibhne ytho, skemunys gans an sans, a gollas y rêson in Cath Mag Roth (Moyra in Conteth Down hedhyw). Suibhne a wandras avell muscok noth oll adro in Wordhen. Herwyth udn tradycyon ev a dhascafas y skians dre dhowr Tobar na nGealt in conteth Kerry. Hanow brâs a’n jeva dowr Tobar na nGealt bythqweth avell sawment rag conar ha clevejow brÿs. Whythrans sciensek a veu gwrÿs wàr dhowr Tobar na nGealt i’n cansvledhen dewetha hag y feu dyscudhys fatell usy meur a’n mûn lythyùm in y dhowr. Lythyùm heb mar yw usys gans sîkyatrydhyon agan dedhyow ny avell ely rag dysordyer dyweghlek pò ‘bipolar disorder’—an hanow arnowyth rag cleves lorek-morethek. Y whre pobel an osow cres soposya fatell ylly vertu spyrysek in dowr certan fentydnyow gorra dewolow in mes a vrÿs nebonen. Yth hevel bytegyns fatell o power radn a’n fentydnyow-na kemegyl kyns ès spyrysek yn udnyk.