(492) Tapîtweyth Bayeux - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Tapîtweyth Bayeux yw padn brôsys dew cans hag ugans troos’hës in hirder hag ugans mêsva in uhelder. Yma va ow tysqwedhes an wharvedhyansow dhyrag conqwest Pow an Sowson gans an Normans. I’n vledhen mil ha whe deg whe Wella Dûk Normandy a ladhas Harold, mytern an Sowson, in Batel Hastings; indelha Wella a veu mytern Pow an Sowson. Yma whedhel kebmyn in Frynk fatell veu an tapîtweyth gwrës gans Mathilde, gwre’ty Wella Conqwerrour ha’y servyadesow. In gwir yth yw an tapîtweyth aswonys traweythyow in Frynk avell La Tapisserie de la Reine Mathilde; tra nag yw gwir. Pelha nyns yw tapîtweyth Bayeux tapîtweyth poynt. Yma meur a’n lin heb gwrias warnodho. Rag hedna brôsweyth ywa (hèn yw ‘embroidery’) adar tapîtweyth. Dre lycklod y feu an arhadow dhe wil an tapîtweyth rÿs gans Odo, hanter-broder Wella Conqwerrour hag epscop Bayeux. Warlergh an Conqwest Odo a veu Yùrl Kynt ha lesruw Pow an Sowson. Lyckly yw fatell veu an tapîtweyth gwrÿs in Kynt, rag i’n dedhyow-na yth o gerys brâs brôsyans an Sowson. Yth yw an tapîtweyth gwrÿs a naw panel gwries warbarth saw an panel dewetha yw anperfeth. Yma an wharvedhyansow dysqwedhys in cres an brôsyans. Taclow bian a welyr i’n dhew amal. Yma an brôsyans ow tallath gans Edward Confessour, mytern an Sowson, ow tanvon Harold mab Godwyn dhe Normandy. Y levery an Normans in dedhyow moy adhewedhes fatell veu Harold danvenys may halla ev tia lelder dhe Wella, saw nyns yw hedna derivys i’n brôsyans. Dre wall yma Harold ow trehedhes an tyller cabm in Normandy hag yma Guy Cont Ponthieu worth y gemeres yn prysner. Harold yw relêssys ha drÿs dhe Wella. Wella a’n gelow i’n eur-na dhe dhos ganso dhe werrya warbydn Conan, Dûk Breten Vian. Warbarth ymowns y ow fetha Conan ha Wella a re arvow ha caspows dhe Harold—dell hevel yma va ow qwil marhak anodho. Yma Harold ena ow tia a-ugh crêryow sans. Nyns yw apert bytegyns pandr’yw sùbstans an ly. Ena Harold â tre hag yma va ow metya gans Edward Mytern; yth hevel nag yw Edward pÿs dâ ganso. Ena yma narracyon ow mos in rag bledhen hag Edward Confesour yw clâv. Yth hevel fatell usy Edward ow promyssya an vyternsys dhe Harold. Ena yma Harold cùrunys gans Stigand Arghepscop. Res yw remembra fatell o Stigand emskemunys gans an Pab ha nag o va consydrys lafyl avell arghepscop. I’n amal avàn y whelyr steren lostek Halley hag i’n amal awoles yma morlu tarosvanus. In Normandy yma Wella hag Odo owth erhy may fe morlu cùntellys. Yma an Normans ow colya dhe Kynt, ha warlergh byldya kerweyth, otta an Normans ow jùnya batel gans an Sowson, an Normans wàr geyn margh ha’n Sowson adroos. Harold yw ledhys hag yma soudoryon an Sowson ow fia. Saw ena yth yw kellys remnant an brôsyans. Yth yw istory an brôsyans dres an bledhydnyow pòr gompleth ha marth yw na veu va kellys. Yth yw Brôsyans Bayeux consydrys onen a’n oberow spladnha a Romanesk Norman. Gans y hirder marthys, erder y lywyow ha’y decter yma va ow provia dynyans dydhyweth.