(496) ‘But’ in Kernowek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Pàn ven ny ow tesky Kernowek, ny a dhesk fatell yw mes an ger ewn rag ‘but’. Yth hevel bytegyns nag yw hedna gwir yn tien, dell vydnyn ny gweles. Yma mes ‘but’ kefys rag an kensa prÿs in Passyon agan Arlùth in: Mes mara kewsys yn tâ ha’n gwrioneth y synsy, prag y’m gwyskyth indelma? Yth hevel nag yw mes ena ken tra ès dysplêgyans a mas. Hèn yw cler dhyworth an examplys-ma a mas in Passyon agan Arlùth: Mas nynj owgh oll dâ na wheg ha Mas re wàr Grist a inyas, yth o dewas a erhy. Kynth yw Homylys Jowan Tregear an text hirha a’gan beus, nyns yw mes ‘but’ kefys in tyller vÿth inhans. Tregear a scrif mas ‘but’ traweythyow, rag ensampyl: In geryow-ma nynj usy ev mas ow promyssya an auctoryta ha Ny vannaf vy na moy agas gelwel why servantys, mas cothmans. Yma mes ‘but’ bytegyns kefys in textow erel, Creacyon an Bÿs, rag ensampyl: Mes y a rejoycyas pòr veur (Creacyon an Bÿs); Nynj eus tra i’n bÿs-ma gwrÿs mes dhywgh why a wra servys (Creacyon an Bÿs). I’n tavas dewedhes y fÿdh mes kemyskys gans but in Sowsnek hag yma hedna ow ry bùs: Bùs in taclow munys, yma anjy ow sewya has gà honen (Pryce); Mytern Jamys ’wrug qwetyas y stoppya bùs ev na alja (Tonkin); Bùs gen nebes lavuryans y a venja dyndel gà boos ha dyllas (Jenkins). Rag leverel an gwiryoneth, saw yw an ger moyha kebmyn in Kernowek a bùb oos rag ‘but, except.’ Otobma nebes examplys i’n textow: Saw na begh y wàr neb cor (Origo Mundi); Dha lev, Arlùth, a glêwaf, saw dha fâss my ny welaf (Origo Mundi); Saw yn tôkyn ow bos glân a woos Jesu Nazare me a wolgh scon ow dêwla (Passio Christi); Saw gwaityens pùb may tocko ganso lorgh pò cledha dâ (Passio Christi); Saw dhyso y leverys kepar dell yw (Resurrexio Domini); Saw pyw a vynn leverel dhe vêwnans ev dhe sevel? (Resurrexio Domini); Saw unn voys wheg a belder a-uhaf in uhelderow ow côwsel cler a leverys pòr ilyn (Bêwnans Ke); Saw lemmyn unn marth a wher (Bêwnans Ke); saw pyw yw ny attendys (Bêwnans Ke); Saw whath res yw mos dhodho hag omdhyvlâmya orto (Bêwnans Ke). Dell yw ûsys saw yw ger Tregear rag ‘but’ yn arbednyk hag yma lies exampyl in y dhornscrif. Yma va worth y spellya saw, sow hag so. Yth esoma ow honen worth y spellya saw pùpprÿs: Otobma nebes examplys in mes a bregowthow Tregear: Saw i’n creacyon a vabden an Tas a ûsyas solempnyta brâs; Saw an nessa cyrcùmstans eus ow folya helma; Saw whath nynj yw mas unn Duw; Saw Duw a wor peskytter may tepprowgh anedhy, why a vÿdh kepar ha Duw; Saw inof vy only yma gweres, confort ha sùcour. Drefen bos saw ‘but’ liesgweyth moy kebmyn i’n tavas tradycyonal ès mes/mas/bùs, me a vynsa comendya dhe genyver onen usy ow côwsel pò ow tesky an tavas, dhe wil devnyth a saw ‘but’ kyns ès mes.