(498) 'Important' in Kernowek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In y erlyfryow Kernowek yma Nance ow comendya try ger pò try lavar rag styrya ‘important’ in Kernowek. An re-na yw a vry, a bris ha bysy. Gesowgh ny dhe veras ortans an eyl wosa y gela. Kyns oll res yw avowa nag yw an lavar a vry ‘of value, of importance’ kefys in tyller vÿth i’n tavas tradycyonal. Yma an lavar verbek gwil vry ‘to take account of’ gwelys yn fenowgh i’n tavas hag in y erlyver a’n vledhen nawnjek try deg eth yma Nance ow soposya hedna dhe dhos dhyworth *gwil a vry. Nyns yw gwirhaval y dybyans. Dre lycklod nyns yw vry < bry tra vÿth ken ès trailyans medhel avell element a’n gestrowen. Rag hedna nyns yw a vry dhe gomendya avell trailyans Kernowek a ‘important’. An secùnd lavar profys gans Nance yw a bris ‘of price, of value.’ Hèn yw kefys in dyvers textow: Dyllas Crist a veu rynnys; peder rann gwrÿs anedha gans peswar marhek a bris (Passyon agan Arlùth); Gromercy, Arlùth a bris, rag dha royow prest yw dâ (Origo Mundi); cytas , trevow a bris (Passio Christi); tus a bris (Keigwin). An tressa ger rÿs gans Nance yw bysy. Yth yw an naser pò hanow gwadn-na ûsys rag mênya ‘important, essential’ ow cowsel a wythres fur. Ot obma nebes examplys anodho: bysy yw dhis bos uvel ha servabyl i’th servys (Passyon Agan Arlùth); bysy yw dhywgh fystena kyns ès y dhe dremena an Mor Rudh sur (Origo Mundi); bysy via dhis gothfos yn certan meur a scryptours, mara mynnyth gortheby hedhyw (Passio Christi); Yma ena meur dhe wul; bysy yw cafos cùssul (Bêwnans Meryasek); Bysy yw dhyn bones war: yma dragon vrâs heb mar i’n cav omma rybon ny (Bêwnans Meryasek). Ow tallath in bledhydnyow deg ha peswar ugans a’n cansvledhen dewetha, y fedha ken ger gwelys i’n gerlyfryow Kernowek gans an styr ‘important.’ An ger-na o *posek. Yth yw hedna growndys wàr an ger poos ‘weight, heavy’ ha dell hevel y feu va comendys der an ger Kembrek pwysig ‘important’. An dyffrans yw y feu pwysig destys rag an kensa treveth in Kembrek mar avarr avell an pymthegves cansvledhen, saw *posek in Kernowek yw ger nowyth gwrÿs in dedhyow an dasserhyans. Pelha nyns yw otham vÿth a *posek. Yma va ûsys dre vrâs i’n lavar *posek yw ‘it is important’, rag ensampyl: *Posek yw dhyn remembra na yllyn ny spêna kebmys pò *Posek yw dhe genyver onen whelas dhe glappya moy Kernowek. Ha dell welsyn ny Bysy yw yw an fordh deythiak dhe formya lavarow a’n par-na. Yth yw *posek gwelys lebmyn in gerlyver wàr lînen an Academy Kernowek, ha lacka whath yth yw an ger gwelys i’m Gerlyver Sowsnek-Kernowek vy a’n vledhen dyw vil. Res yw avowa na veu an ger desmygys *posek bythqweth radn a’n tavas tradycyonal. Ha nyns esa ha nyns eus otham vÿth anodho na neyl. Rag hedna sham brâs yw genama bythqweth me dhe worra ger mar gog i’m gerlyver.