© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An hager-awel henwys Éowyn a weskys Breten Veur ha Wordhen an peswora dëdh warn ugans a vis Genver hevleny. Yth yw leverys fatell veu an hager-awel-na an gwetha enawel nans o peswar ugans bledhen ha fatell esa an gwyns ow trehedhes traweythyow an toth a voy ès udn cans ha deg mildir i’n our. Obma in Wordhen y feu tôwlys dhe’n dor lies gwedhen. Hedna a wrug damach dhe lies chy ha meur a gerry tan a veu drog-shyndys. Lacka whath an gwyns a dôwlas dhe’n dor milyow a beulyow tredan. Hedna a dorras lînednow an tredan adro i’n pow hag y feu ogas dhe eth mil cytysan gesys heb power. Mars esa pobel ow tobma aga threven gans tredan, yth esens in ancombrynsy brâs, rag yth o an gewar pòr yêyn. Mars esens y ûsys dhe barusy boos gans tredan, yth esens y in caletter lacka whath. Saw nyns o hedna pùb tra. Heb tredan ny ylly meur a’n hensy horn pêsya ow resek, rag yth o otham a dredan rag obery an arwedhyow ha radnow erel a’n system. In tyleryow otham o a dredan rag purhe ha rag pùmpya dowr hag ytho y feu lies teylu gesys heb dowr kefrÿs. Try dëdh warlergh an hager-awel an auctorytas a restras cresednow socour in tyleryow dyvers. Yth esa an cresednow-na ow provia servyssyow rag an re-na o whath heb tredan, rag ensampel dowr glân, sosten tobm, cowosow omwolhy, mainys dhe wolhy dyllas, tyleryow dhe garga pellgowsoryon kerdh ha rag cafos an inter-ros. An Governans a besys gweres orth an Udnyans Ewrôpek; ha’n Ewropêans a brovias seytek generador tredan. I’n secùnd jorna wosa an hager-awel yth esa jynoryon tredan dhyworth an Wlascor Udnys solabrÿs ow qweres Cowethas Tredan Wordhen owth êwna an rosweyth tredan. Yth esen vy ha’m gwreg in agan chy degolyow in West a Wordhen pàn wharva an hager-awel. Devedhys en ny gans caryans poblek ha rag hedna ny’gan be carr tan genen. Kynth eson ny ow tobma an chy gans tredan, yth esa dhyn cunys lowr dhe anowy tan. Ha pelha yth esen ny ow parusy boos gans gass in bottel. Yth o dhyn boos lowr ha ny a ylly bryjyon dowr kefrÿs rag gwil hanaf a dê. Warlergh dhe’n howl sedhy, yth esa dhyn cantolyow, saw avês dhe rom an olas, fest yêyn o an chy. Ny yllyn ny golhy agan honen na gwil troncas ha wosa dew dhëdh ny a erviras mos tre. Wàr an viaj tre in tewolgow an gordhuwer apert o dhyn fatell o meur a’n treven adro heb tredan. Pàn wrussyn ny drehedhes Ballina rag kemeres an train dhe Dhulyn, derivys veu dhyn fatell rêsa dhyn mos wàr dhew vùss in le a’n train bys in Athlone in cres Wordhen. Ena ny a gafas train dhe Dhulyn. Saw hedhyw, seythen wosa an hager-awel, whath yth yw moy ès tryugans mil deylu heb tredan. Leverys yw hedhyw i’n jëdh Wordhen dhe vos pow rych. Saw cler yw na veu lowr a vona spênys wàr istarneth pò ‘infrastructure’ an tredan dres lies bledhen. Yma lînednow an tredan in Wordhen ow longya dhe’n cansvledhen dewetha.