© 2017 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An ger Kernowek rag ‘child’ yw flogh ha’n form liesek yw flehes. Yth yw an keth ker kefys in Bretonek avell floc’h, saw in Bretonek yma an ger ow styrya ‘paja, sqwier’ kyns ès ‘flogh’. Dre lycklod y feu flogh in Kernowek ha floc’h in Bretonek benthygys dhyworth an ger vlôch in Almaynek Cres, le may ma an ger ow styrya whadnen pò ‘flea.’ Dell hevel yma an ûsadow ow referrrya dhe scafter ha bewder an paja owth eskydna margh. Mara peu an ger flogh ‘child’ in Kernowek kemerys dhyworth Jerman an Osow Cres, ena yth ywa goos nessa ‘flea’ in Sowsnek. Rag leverel flogh yma an Gembrion ow cul devnyth a’n ger plentyn. Hòn yw an form udnyk. An form gùntellek pò ‘collective’ yw plant ‘flehes.’ Plant a veu benthygys dhyworth planta in Latyn, ger usy ow mênya ‘egyn, skyllen, losowen yonk’. An styr flehes yw istydnans a’n sens-na. Y feu an ger planta kemerys kefrÿs avell clann ‘teylu, flehes’ aberth in Godhalek Wordhen ha Scot-Godhalek. Ha’n ger-na y honen a veu benthygys gans Sowsnegoryon avell ‘clan’, teylu istydnys pò ‘extended family’ in Scotlond. Dell welsyn ny, yth yw an ger floc’h kefys in Bretonek gans an styr sqwier pò paja. In Bretonek an ger ûsys rag flogh yw bugel, ha’n plûrel yw bugale. Yth yw bugel in Bretonek dhe gomparya gans bugel ‘shepherd’ in Kernowek. I’n termyn eus passys, pell dhyrag dedhyow an adhyscas constrînus pò ‘compulsory education’, yth esa an flehes, spessly an vebyon, ow kemeres with a’n enevales wàr ves wàr an gonyow. Goos nessa an ger bugel ‘child’ in Bretonek ha bugel ‘shepherd’ in Kernowek yw kefys in buachaill ‘maw, mab’ in Godhalek Wordhen. Yth yw an ger buachaill pòr gebmyn i’n tavas. In Wordhen yma pobel a viajyoryon aswonys avell sery gwydn ‘tinkers’ pò travloryon ‘travellers’. Nyns yw godhvedhys poran pandr’yw aga devedhyans, saw certan yw nag eus colm vëth intredhans y ha’n jypsons pò ‘gypsies’. An dravloryon a’s teves aga thavas aga honen. Yth ywa fùndys wàr an Sowsnek, saw yma lies ger Godhalek ino kefrÿs. An hanow sodhagyl rag an yêth-ma yw Shelta, saw yma y gowsoryon orth y henwel De Gamon. Lies ger in Shelta re beu gorrys mes a aswonvos dre settya an sowndys baxy forcy. Rag ensampyl póg ‘kiss’ in Godhalek yw góp in Shelta, ha doras ‘daras’ in Godhalek yw rodas in Shelta. An ger buachaill ‘maw, mab’ a veu dyfelebys in Shelta dhe balluach, balluak. Hag y feu hedna drës aberth in Sowsnek y honen, le may ma va owth apperya avell bloke.