© 2017 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Arthur Saxon Dennett Smith a veu genys in Sussex in mil eth cans eth deg try. Ev o yethor fest skentyl. Kyns oll ev a dhescas Kembrek ha screfa lyver rag dyscoryon henwys Welsh Made Easy, lyver a werthas fest dâ. Ena ev a omsettyas dhe dhesky Kernowek hag omdava gans Nance. Gans gweres Cornish for All ev a dhescas Kernowek hag a veu recêvys in Gorseth Kernow avarr in bledhydnyow deg warn ugans gans an hanow bardhek Caradar. Orth dallath an bledhydnyow deg warn ugans yth esa Caradar ow tesky tavosow arnowyth in Scol Blundell in Tiverton, Gwlas an Hâv. Ena ev a dhetermyas ry classys Kernowek avês dhe’n cors ûsys. Rag y dhyscasow Caradar a screfas lyver bian henwys Lessons in Spoken Cornish, lyver may feu pymp cans copy gwerthys anodho. In mil naw cans try deg try Caradar a dheuth dhe drega in Kernow hag a restras classys gordhuwher ena hag inwedh ev a dhalathas lyver termyn in Kernowek henwys Kernow, a veu pymthek nyver anodho dyllys. Warlergh nebes bledhydnyow res veu dhe Garadar gasa Kernow dre rêson y vabm dhe vos clâv, saw ev a dhyllas y Awayl herwyth Sen Mark in mil naw cans try deg whegh. Teyr bledhen warlergh hedna ev a dhyllas y lyver moyha a bris Cornish Simplified. Rag an kensa prÿs dhia bàn dhalathas an dasserghyans Kernowek yth esa lyver a vynsa ry dhe dhyscoryon fùndacyon gramer an tavas dhyworth an dallath in dyscasow gradhegys. Caradar a dhyllas dew drailyans aral i’n bledhydnyow dewgans, Nebes Whethlow Ber ha Whethlow an Seyth Den Fur a Rom. Y drailyans hirra bytegyns o Trystan hag Ysolt, ober a lavuryas ev warnodho hag ev wàr dhevar avell Warden Ewhiasow Air pò ‘Air Raid Warden’ i’n Secùnd Gwerryans an Bÿs. Trailyans in gwersyow Kernowek yw Trystan hag Ysolt a whedhel Frynkek Coth cùntellys avarr i’n ugansves cansvledhen gans an scoler Joseph Bédier. Smith a verwys in mil naw cans ha hanter-cans kyns ès ev dhe golenwel Trystan hag Ysolt. Y feu an lyver dyllys an nessa bledhen dre larjes y vedhowes avell covath dh’y gour tremenys. Yn fenowgh ny wre Caradar acordya gans Nance adro dhe neb poynt i’n Kernowek Udnys saw pùpprës Caradar a wre omry dhodho. Caradar a ylly screfa ha côwsel Kernowek heb hockya hag ev, moy ès ken den vÿth martesen, a dhysqwedhas fatell ylly an tavas Kernowek bos dasserhys.