© 2017 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yth esen vy in mesk ragprenoryon An Lef Kernewek i’n bledhydnyow whegh deg ha seyth deg an gansvledhen dhewetha. Me a dhanvonas taclow dhe Dalek, an penscrefor, dhe bryntya i’n lyver termyn ha pùpprës ev o pës dâ cafos neb tra dhe lenwel an folednow. Pòr larch o Talek owth inia pobel yonk ow whelas desky Kernowek ha screfa ino. Lies Kernowegor a screfas kyns oll i’n Lef Kernowek ha mos in rag warlergh hedna dhe gemeres radn vrâs in dasserghyans an tavas. Talek a screfas dhybm yn fenowgh hag a gampollas meur a daclow a les. Rag ensampel ev a gows adro dhe’n system nowyth a apposyansow drës ajy gans Gorseth Kernow i’n bledhydnyow whegh deg. Pàn veuma gwrës bardh ow honen in mil naw cans whegh deg dew, nyns o res ma’s screfa darn hir in Kernowek. In y lytherow yma Talek ow croffolas yn fenowgh nag usy an bobel ma’s ow cul an apposyansow rag bos degemerys avell berdh hag ena owth ankevy an tavas yn tien. Ha nyns o va contentys whath gans an bobel na ylly mos pelha ès an kensa gradh. Ny wrug Talek pryntya ma’s pymp cans dascrif a Nebes Whethlow Ber in mil naw cans pymp deg dew, saw in lyther dhybm dewdhek bledhen moy adhewedhes yma Talek ow croffolas fatell esa copiow ganso nag o prenys whath. Yth esa taclow erel wàr vrës Talek pùpprës. Rag ensampel termyn devedhek y scol bryveth in Mownt Plesont, fowt brâs a ragprenoryon rag An Lef Kernewek ha’n caletter a’n jeva ev ow sensy an lyver termyn yn few mar lies bledhen. Serrys o Talek inwedh ow predery adro dhe scolers Kembrek ow cul ges a’n Kernowek, rag ensampel Simon Evans, neb a screfas in artykyl adro dhe’n “miserable remains of Cornish.” Saw pùpprës an dra o moyha bern dhe Dalek o an tavas Kernowek y honen. Drefen ev dhe wodhvos moy a’n tavas ès ken den vëth i’n dedhyow-na, y fedha pobel ow tos dhodho yn fenowgh rag trailyansow dhe Gernowek. Yth o Susan Chapman ha Malcolm Smith dhe dhemedhy in eglos Peran ar Wodhel mis Hedra an vledhen mil naw cans whegh deg peswar. Y a besys Talek dhe dharbary dhodhans trailyans a servys an demedhyans in Kernowek. Hèn o an kensa maryach in Kernowek Dasvewys. Talek a screfas dhybm y vos trist na ylly Mordon pò Caradar gwil an trailyans, rag nag o va pës dâ poynt gans y drailyans y honen. Hèn o Talek. Ev a wodhya meur, saw uvel o y golon pùpprës. Arlùth Jesu Crist a nev, kemmer mercy a’y enef.