© 2017 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n Testament Coth an Nazarît o den in dadn ly dhe omwetha dhyworth ‘gwin ha dewas crev’. An ger Ebrow rag ‘dewas crev’ yw shechar ha’n ger-na a veu benthygys gans an Grêkys avell sikera ha gans an Romans avell sicera, cisera. Nyns yw certan pandr’o shechar. Yma certan scolers ow cresy y dhe vos coref a neb sort saw yma re erel ow cresy nag usy an ger shechar ow styrya ma’s ehen a win. Pàn dheuth an ger Latyn cisera aberth in Frynkek, bytegyns, apert o an gowsoryon dhe gresy an dewas intendys dhe vos sugan bragesys avallow. In Frynkek cisera a dhysplegyas avell cisre pò cidre. Cisre a ros sistr, jistr ‘cider’ in Bretonek ha cidre yw penfenten cider in Sowsnek agan dedhyow ny. Yth yw an ger cîder ‘cider’ kefys in Kernowek inwedh, in gwary Bêwnans Meryasek. Kerens Meryasek yw anês adro dhodho hag ev tregys avell hermyt wàr dop an meneth. An sans a lever dhedhans pana lowen ywa dhe vos y honen oll ha cosoleth dhodho dhe wordhya Duw dëdh ha nos. Y vêwnans yw sempel, yn medh ev, hag yma hedna ow ry chauns dhodho dhe dempra drog-whansow an kig. Meryasek a lever:
In ow nessa hevys reun
ny evaf cîder na gwin
na dewas marnas dowr pur;
hag erbys an goverow
a vëdh ow boos dhe’m prëjyow
na vo re fors ow natur.
Yth yw cîder campollys rag an secùnd treveth wosa mernans Meryasek. Decanus, an deyn pò ‘dean’ a lever adro dhe’n sans tremenys:
Haval o ow cordhya Crist
prest orth Sen Jowan Baptyst:
gwin na cîder ny ûsya.
Yma hedna ow referrya dhe Awayl Sen Lûk le mayth yw leverys na wra Jowan Baptyst eva naneyl gwin na sikera, ha dell welsyn ny, dre lycklod sikera yw coref pò neb sort aral a win. Apert yw pobel a oos Meryasek dhe gresy fatell o cîder intendys gans Sen Lûk. Êsy yw convedhes prag y cresy an bobel-na fatell wre Meryasek omwetha y honen dhyworth cîder kyns ès dewas aral. Meryasek o Breton ha dewas medhow Breten Vian o hag yth yw cîder.