© 2024 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In Kernowek yma an ger ytho ow mênya ‘therefore’. Yma hedna kefys menowgh lowr i’n Passyon agan Arlùth: ytho myghtern ôta sa, yn medh Pylat i’n eur-na; in Origo Mundi: ytho bedhyth melegys pòr wir dres oll an bestas; ha res yw dhis mones ytho bys in Ejyp dhe Farô; in Passio Christi: ytho mar qwrewgh ow whelas, gesowgh ow thus eus genef dhe ves qwît dhe dremena; hag in Resurrexio Domini: ytho in pryson ev â; hager vernans a’n par-na ev a’n gevyth. Yma udn exampyl in Bêwnans Ke: Ytho try duw yma dhis: Jovyn, Beryth hag Astrot. Dell hevel nyns eus sampyl vÿth a ytho in Bêwnans Meryasek, in Creacyon an Bÿs nag in Homylys Tregear. Pelha yth eson ny ow merkya fatell yw an ger ytho spellys i’n keth fordh pùpprÿs, hèn yw dhe styrya y-t-h-o. Dre hedna apert yw fatell usy an pooslev wàr an secùnd sylaben. A pe an pooslev wàr an kensa sylaben, ena an o dybooslef a via gwrÿs <a>, comparyowgh ganso > gansa, ragtho > ragtha moy holergh. In gwir yth yw an ger ytho coynt lowr i’n Kernowek, rag nyns yw ger vÿth avello i’n tavas tradycyonal, hèn yw dyw sylaben yn udnyk hag /o/ pooslevys i’n secùnd sylaben. Dre lycklod an ger ytho o mar goynt dhe Gernowegoryon i’n dedhyow coth nag êns contentys ganso saw y a wrug alowa dhe’n ger codha dhe ves; y a wre devnyth a rag henna ‘therefore’ in y le. Otobma nebes examplys in Passyon agan Arlùth: Rag henna gordhyn nefra Jesus neb agan pernas; Rag henna an vuscogyon orto a borthas avy; Rag henna y tanvonas Crist dhodho ev ma’n dampna. Hag otta nebes examplys in mes a’n try gwary a’n Ordinalia: ha rag henna yn certan warbarth oll hy fehas glân dedhy y fÿdh gyvys; Rag henna me a sorras hag a dos na wren nefra; Rag henna an gwella eus dascor myns mona yw pës; Rag henna neb a’m gwerthas meur dhe voy ev re behas; Rag henna igor hep mar, why pryncys; Rag henna tus ervys freth gor dh’y wetha adermyn; rag henna me a’th pÿs, crÿs a dermyn; ha Rag henna mos a wren dhy dell yw leverys dhyn ny. Dre lycklod an ensampyl moyha adhewedhes a rag henna yw kefys in lyther Jowan Boson screfys in mis Ebrel whêtek ha deg: Rag hedna ny’ell gwelas ha ajwon an tavas Kernowek dha bos tavas coth ha trueth yw dha bos kellys. Kemerys oll warbarth yma adro dhe dhew exampyl warn ugans a ytho ‘therefore’ in oll textow an tavas tradycyonal. I’n keth textow bytegyns yma moy ès deg ha cans exampyl a rag henna. Kyn nag eus exampyl vÿth a ytho in dornscrif Jowan Tregear, yma ogas dhe dhewgans exampyl a rag henna dhodho. Yth o liesgweyth moy kerys rag henna ‘therefore’ gans Kernowegoryon tradycyonal ages ytho. Pelha y fedha ytho percêvys gansans dhe vos a’n fashyon coth. Kyn na via ewn comendya dhe Gernowegoryon agan dedhyow ny, may whrellens ankevy ytho yn tien, dùstuny an textow yw rag henna dhe vos preferrys gansans rag kescows kenyver jorna.