An Wheffes Harry, Tressa Radn - lovinglivingcornish

William Shakespeare

Act 2, Golok 5

Gwerryans an Rosednow, Batel Towton, Pow Evrok, de Sul Blejyow, an 29ves a vis Merth 1461

Lymnans gans Richard Caton Woodville Jr (1922)

Alarm. Mab a wra entra, neb re ladhas y Das, hag ev ow try an corf marow.

Mab:

Otta drog na veu dâ dhe vody vÿth, na dhe’n den-ma, a wrug vy ladha in bresel glos. Bedhens ganso creun cùrunyow; hap may hallaf ravna lemmyn dhyworto, hap me destnys dh’aga ry ha’m bêwnans warbarth dhe neb aral, par dell usy hemma ow ry yn farow dhymm – Pywa? – Ogh Duw! Fâss ow thas yw, a wrug vy ladha i’gan strif heb y wodhvos. Ogh termyn poos, ow qwil may wharv' indelma! In Loundres y feuma gans an mytern constrînys dhe’n keskergh: ow thas, gwas Yùrl Warwick, a dheuth in party Evrok, constrînys gans y vêster-na; ha my, neb a gemeras ow bêwnans a’y dhêwla, re’n omdhevasas a’y vêwnans ev. Gav dhymm, a das, rag na’th aswonys! – Ow dagrow a vynn glanhe an merkys gosak-ma; ha ken ger vÿth erna vowns y deverys bys i’ga lanow.

Harry Mytern:

Ô golok druesy! Ô gosak an oos! Hedre vo lions ow qwerrya, in batel fow rag fow, yma ên dydrok truan ow codhaf aga envy. – Gwra ola, a dhen trist, ha my ow qweres orth pùbonen a’th tagrow; ha gesyn agan colon ha’gan lagas dhe vos, kepar ha'n gwerryans dynasek, dall dre dhagrow, ha dhe derry gorhargys gans grêf.